[A:༢༡༨]བསྒོམ་བཟླས་ཀྱི་ལྷའི་ང་རྒྱལ་བརྟན་པོས་ཐོག་མར། ཨོཾ་ཨཱ་ཀ་ནི་སོགས་དང༌། གཙུག་འབར། རིག་འབར། རིགས་གསུམ་མགོན་པོ། དེ་ནས་གུར་དྲག་རྣམས་ཀྱི་ལྗགས་སྔགས་བཟླ་བཞིན་པར་བུམ་ཆུ་དུ་མ་འཐོར་བར་མཛད་པ་དང༌། སངས་རྒྱས་བྱང་སེམས་སོགས་ཀྱི་སྐུ་ཞི་དྲག་མང་པོ་རྟེན་སྒོམ་རྣམས་དང་བཅས་སྐུ་གདུང་རིན་པོ་ཆེ་ཕེབས་བྱམས་ལ་གདན་འདྲེན་ཞུ་མི་མགྲོན་གཉེར་རྒྱལ་ཚིང་དང་ཚེ་བསམ་ནས་འགན་བླངས། ལྷ་ཆེན་རྒྱལ་སྒོའི་ནང་དུ་ཕེབས་པ་ནས་བཟུང༌། རྗེ་ཉིད་རྒྱལ་བ་ཚེ་མཐའ་ཡས་པའི་ངོ་བོར་བཞེངས་ཏེ། ཚེ་གཟུངས་ཨོཾ་གསུམ་མ་ལྗགས་བཟླས་མཛད་མུར་མཐོང་སྨོན་བླ་བྲང་ཕུན་ཚོགས་གླིང་གི་གཟིམ་སྤྱིལ་གསར་པ་རྗེ་ཉིད་ཀྱིས་གསར་བསྐྲུན་ངོ་མཚར་དཔལ་འདྲེན་དུ་ཕེབས་འཕྲལ། ཕར་ཕྱིན་དྲུག་གི་ཤིས་བརྗོད་བྱབས་ཁྲུས་སོགས་མཛད་མུར་ཆར་ཆེན་པོ་ཞིག་བབས་པས། རྗེ་ཉིད་ཀྱི་ཐུགས་ལ་རྟེན་འབྲེལ་ལ་སྒྲིག་མི་དགོས་ཟེར་བ་འདི་ཡིན་དགོངས་པ་འཁྲུངས་ཤིང༌། གཟིམ་ཆུང་རྩེར་ལྷ་བསངས་དང༌། དེ་ནས་རྣམ་འཇོམས་ཁྲུས་སྦྱངས་ཚེ་ཆོག་ལོ་གཏོར་གསར་འཛུགས་རྣམས་མཛད་ཅིང༌། རིག་འཛིན་ཕོ་བྲང་དང་ལྷ་ཆེན་རྩེར་བྱང་པ་ཚོགས་ཡོངས་ནས་ལྷ་བསངས་བསྐང་གསོ་སོགས་ཞལ་བཀོད་བཞིན་དང༌། གནས་དེ་དག་གི་རྩེ་ནས་ཉིན་གང་དར་འཕྱར་དུང་འབུད། གཞན་ཡང་ཀོང་གཞས་བཅས་དང༌། རིམ་གྱིས་ཕུར་སྒྲུབ་ཕྲིན་འཆོལ་སྔོན་འགྲོའི་དངོས་གཞིའི་མཆོད་གཏོར་རྣམས་སྔར་བས་ལྡབ་འཕར་དང༌། བཅུ་བཞི་བཅུ་དགུ་ཉེར་ལྔ་སོགས་ལ་དཀྱིལ་འཁོར་ཟངས་དྲའི་སྒྲོམ་རྩེར་གདུགས་