[A:༢༥༨]ཞིང༌། བོད་དང་སྔར་ནས་ལུགས་མཐུན་རང་ཡིན་པ་བཞིན། སླད་ནས་ཀྱང་དེ་བཞིན་བཅས་ཊམ་གསར་འཇའ་འུ་དངུལ་ཚད་ལྷད་མེད་འདི་བཞིན་འདོན་རྒྱུ། བོད་ནས་ཀྱང་གསེར་ཐང་བརྒྱད་མ་སོགས་དང༌། རྒྱལ་བ་ཡབ་སྲས། རྒྱལ་ཚབ་དམ་པ། བཀའི་དགུང་བློན་རྣམས་བཅས་ལ་རྒྱུ་མཚན་ཞུ་རྒྱུ་བཅས། འདི་ནས་ཀྱང་ཆར་པ་ཆུ་གྲོགས་དང༌། གཞན་ལའང་བཀའ་འདོམས་དགོས་ཚུལ་རྒྱལ་པོའི་བཀའ་ཤོག་ལའང་ཡོད་ཅིང༌། ངག་ལམ་ནས་ཀྱང་ཞུ་དགོས་བཞིན་བླ་མ་ཁྱོད་ཀྱིས་ཕན་འགྱུར་བྱེད་དགོས་ཞེས་གླེང་བར། རྗེ་རྡོ་རྗེ་འཆང་གི་གསུང་ལས། ཕྱག་མཛོད་སོ་སོ་དང་ཚོང་འདུས་སོགས་གང་སར་ཕན་བཞེད་དེ་བཞིན་རྗེས་སུ་ཡི་རང༌། རང་ནི་གདན་ས་གོ་མཐོ་བ་ལས་རྒྱལ་ཁམས་ལ་བཀོད་པ་ཐུབ་པ་ཞིག་མིན་ཡང༌། སྙན་འབུལ་ཞུ་འོས་ཚད་མར་ཁྱེད་རྒྱལ་བློན་གྱི་དགོངས་པ་བཞིན་སྣེ་འབྱོར་ཡང་དག་ཞུ། སྔར་ནས་གཡུལ་ཁོ་ནས་འོ་བརྒྱལ་བྱུང་འདུག་པས། ད་ཆ་ལུང་པ་དེས་མཚོན་སེམས་ཅན་རྣམས་ལ་བྱམས་སྐྱོང་མཛད་ན་དོན་ཐམས་ཅད་འགྲུབ་པས། རྒྱལ་པོར་དེ་བཞིན་ཞུ་གྲོགས་གྱིས། ཞེས་པའི་རྡོ་རྗེ་ཐ་ཚིག་དེས་ཁོང་རྣམས་ཐལ་མོ་སྦྱོར་ཞིང་མགོ་དུད་པ་བཅས་དགའ་མགུ་ཡི་རང་ལ་འཁོད་ཅིང༌། ཟུར་གསོས་སོགས་གནང་ཆ་ཡང་དག་མཛད། ཉེར་དགུའི་ཉིན་བསྐུལ་དང་བསྟུན་ཕྱོགས་བཞིར་རུ་འདྲེན་དང༌། ལས་མགོན། གུར་ལྕམ་དྲལ་གྱི་འཆམ་སྐུ་བྱིན་ཅན་རྣམས་འཆམ་པར་མཛད་པས། ཆུ་ཁ་མར་དུས་གསུམ་རྒྱལ་བའི་དྲག་བསྐུལ་དུས། མཁས་བཙུན་ཆེན་པོའི་ཐུགས་དམ་