[A:༢༥༩]མ་ཁྱེར་མིས་མ་ཐེག་པས་ཉེན་བསླངས། ཟོར་འཕེན་ཕྱོགས་སུ་ཞལ་བུབས་ལ་ཁད་ཀྱི་ཉམས་དང༌། རླུང་ཕྱོགས་ཀྱང་ལེགས་ཤིང༌། བྱ་ཁྲ་མར་མདུན་གྱི་ཤུལ་འདྲེན་མཚོན་པའི་བུ་མོ་རྣམས་ནས་ཞིང་སྟེང་དུ་མདའ་དར་དྲང་པོར་བཙུགས་པས། རྗེ་ཉིད་ཀྱི་གསུངས་ལས། མི་འགྱུར་ཚེ་ཡི་ཀ་བ་ཚུགས་རྟགས་སུ་འདུག་གསུངས། སྨིན་ཟླ་སྔོན་མར་ནང་སོ་མགོན་ཁང་དུ། རྟེན་མདོས། རྟག་གཏོར་སོགས་འཛུགས་གནང་སྐབས་མདོས་གཞུང་དམ་པས་མཛད་པའི་མགོན་མདོས་རྒྱས་པ་དང༌། པུ་ཏྲའི་སྒེར་མདོས། བསྐང་གསོ། མདོས་ཀྱི་ཕྱག་ཚད་ཡི་གེ་རྣམས་གུང་བསྒྲིགས། གཤོམ་དང་འདོན་འགྲིགས་དབྱངས་རོལ་བཅས་རྗེ་ཉིད་ནས་ཞག་འགའ་གནང་བས་ངོ་མཚར་བའི་རྟགས་ཀྱང་མང་དུ་འཁྲུངས་ཤིང༌། དེ་མཚམས་ནས་རྗེ་རྡོ་རྗེ་འཆང་ཉིད་ཀྱི་ཐུགས་བསྐྱེད་རྨད་དུ་བྱུང་བས། གདན་ས་ཆེན་པོ་འདིར་རིག་གནས་ཀྱི་སློབ་གྲྭ་འཛུགས་བཞེད་རིང་མོ་ཞིག་ནས་འཁྲུངས་པ་དེ་ཉིད་ཕྱག་ཏུ་སོན་ཏེ། མཁས་དབང་ཞེ་ཆེན་དྲུང་ཡིག་འབྱོར་ཞིང་ཆོས་གྲྭ་ལྷོ་ནས་གྲངས་བཅུ་དྲུག་ཐོག་མར་སློབ་གྲྭར་བཀས་མངགས་ཏེ་འཕགས་ཆེན་མཆོག་གི་སྤྱོད་པར་ཐུགས་གཞོལ་བའི་སྐབས་སོ། །
དགུང་གྲངས་ཞེ་གཉིས་སུ་ཕེབས་པ་ལྕགས་སྟག་དབོ་ཟླའི་ནང༌། སོག་ཡུལ་ཧ་ལ་ཤན་ནས་དྭགས་པོ་སྤྲུལ་སྐུ་འབྱོར་བར་སྡོམ་གསུམ་རབ་དབྱེའི་ལྗགས་ལུང་ཞིག་བསྩལ། ནག་ཟླར་མཛོད་འཛིན་པར་རང་རེའི་ལྷ་ཁང་ཆེན་མོ་འདི་བྱང་ཤམྦྷ་ལའི་རིགས་ལྡན་གྱི་ཕོ་བྲང་རྩེར་འགྲན་ཟླར་མཆིས་ན་མ་