[A:༦༢༤]པ་ལས། རིགས་སྲས་གདུང་སྲས་ཟུང་དང་རྗེ་བཙུན་མ་སྐུ་མཆེད་གསུམ་བཅས་ལྕམ་སྲིང་ལྔ་ཙམ་འཁྲུངས་པ་ལས། གཅེན་མོ་སྐུ་བགྲེས་པ་ནི་བདག་གི་སྐྱབས་གཅིག་རིགས་བརྒྱའི་ཁྱབ་བདག་རྗེ་བཙུན་རྟ་མགྲིན་དབང་མོ་སྐལ་བཟང་ཆོས་ཀྱི་ཉི་མ་དེ་ཉིད་ནི། མེ་སྤྲེལ་ལོར་སྐུ་བལྟམས་པ། གཞོན་ནུ་ནས་གཅེན་པོ་རྡོ་རྗེ་རིན་ཆེན་དང་ལྷན་དུ་གུས་པའི་དཔོན་སློབ་ཡོངས་འཛིན་མ་ཏིས་མུ་ཏྲ་དེ་ཉིད་གནས་ཀྱི་སློབ་དཔོན་དུ་བསྐོ་བཞག་བསྩལ་བར་བསྟེན་གནང་གིས་ཀློག་འདོན་ཆོས་སྤྱོད་རྣམས་རྗེ་བཙུན་མ་ཡིན་ཡང་སྐུ་གདུང་དང་འདྲ་བར་སྦྱོང་བརྡར་གནང་བ་དང་། གཞན་ཡང་ཀུན་རིག་ནཱ་རོ་མཁའ་སྤྱོད་དགེས་རྡོར་ཕུར་པ་སོགས་ཀྱི་མངོན་དཀྱིལ་དང་ཕུར་ཆུང་གཏོར་བསྔོ་ཆེན་མོ་བསྐང་བ་འགོ་ལུགས་བསྟོད་སྙིང་ཕུར་བཟློག་སོགས་མང་བ་རྣམས་ཀྱི་ཆོ་ག་ཕྱག་ལེན་དབྱངས་རོལ་སོགས་ཚང་མ་ཐུགས་སུ་ཆུད་པར་མཛད་ཅིང་། བར་སྐབས་རྣམས་སུ་ཡབ་རྗེ་སྐུ་མཆེད་ཟུང་དང་ངག་དབང་ཀུན་དགའ་རྒྱལ་མཚན་སོགས་ལས་ཕུར་དབང་བདེ་མཆོག་ནག་པོ་ལུགས་མཁའ་སྤྱོད་མའི་ཆོས་སྐོར་མང་དུ་གསན་ཅིང་། འདྲེན་མཆོག་རྡོ་རྗེ་རིན་ཆེན་ལས་ལམ་འབྲས་ཚོགས་བཤད་འཇིགས་བྱེད་མགོན་པོ་ཡི་ཆོས་སྐོར་རྣམས་དབང་རྗེས་གནང་ལུང་ཁྲིད་བཅས་ཆ་ཚང་བ་དང་། སྒྲུབ་ཐབས་བརྒྱ་རྒྱམ་དང་རྗེས་གནང་ཟུར་བཀའི་རིགས་རྣམས་སྒྲུབ་ལུང་བཅས་ཕལ་ཆེར་བུམ་པ་གང་བྱོར་གསན་འདུག་པ་དང་། གཤེར་དམར་ལྷ་བཅུ་གསུམ་སོགས་དང་རྡོ་རྗེ་ཕྲེང་བ་ཞལ་གྱི་ཆོས་སྐོར། དམར་པོ་སྐོར་གསུམ་བེ་བུམ། ས་སྐྱ་བཀའ་འབུམ་སོགས་བཀའ་འབུམ་རིགས་ཙམ་མ་གཏོགས་གཞན་རྡོ་རྗེ་རིན་ཆེན་གྱི་གསན་སྐོར་ཕལ་ཆེར་