[A:122]'breng ko te lung pa/ tshe skong sne zur ba bzhi las dgon gyi bu bzhir grags pa/ kha rag sgom chung dang lnga te/ de rnams so so'i rgyud/ khyad par sne zur ba'i rgyud/ gtsang na drang po lung pa dang spyi bo lhas sa pa la sogs pa dang / dbus na rgya ma rin chen sgang pa'ang yin te/ de la sogs pa gdams ngag gtsor bor ston pas bka' gdams gdams ngag par grags so/ /yang jo bo'i slob ma nag tsho lo tstsha ba/ de'i slob ma rong pa phyag sor ba/ sku tshe ril po sku mtshams la bzhugs/ lan gcig 'khrug bzlums la bton pa/rma tsha byang rdor gyis 'on shang dror spyan drangs te/ grwa pa lnga brgya dang bcas pas chos zhus pa'i nang nas zur chos pa bzhis zin bris so sor byas pas/ bstan rim bzhi byung bas/ rong pa'i bu bzhir grags pa ni/ zul shu'i bya 'dul ba 'dzin pa chen po/ rang rtog can pa/ gtsang na zhu lan pa chen po/ /nam 'bar ba chen po/'dis gnam 'bar dang ram lha sdings btab/ de dag ni rong pa'i bka' brgyud lags/ rong pa phyag sor ba'i dgon pa bcom chung ba'i phu/ rwa sgreng gi 'og na yod pas/ bka' gdams 'og mar grags te/ rwa sgreng bka' brgyud dang gnyis ka la bka' gdams gong 'og du grags so/ /rgyal srid 'dod yon yongs dor nas//gzhan dag bde bas thugs dgyes pa//