[A:124]bdun pa/ rngog lo tstsha ba'i bshad brgyud kyi mdzad pa ji ltar 'phel ba'i skor/ dpal ldan rngog lo'i bshad brgyud 'di ni shin tu ches bka' drin che ba zhig yin te/ gangs can ljongs na bshad nyan mdzad pa phal cher lo tstsha ba chen po las ma brgyud pa med pas so/ /de la sngon gyi yi ge la 'di ltar snang ste/ kha ba can gyi ljongs 'brog mtsho dang nye ba'i sar/ sngags rnying ma ba'i dge bshes rdo rje gzhon nu bya ba la sras lnga yod pa'i che shos rngog legs pa'i shes rab kyis/ jo bo chen po rje'i phyag phyi la byon pa'i dus su/ snye thang nas gsang phu la phyag mdzub btsugs te/ lung pa ya gi'i nang na dung g.yas su 'khyil ba 'dra ba gcig yod/ de'i steng du legs shes khyod rang gtsug lag khang thob la bshad nyan gyis zhes lung bstan pas/ de nas dus mi ring ba zhig na brag nag gi 'og der sde chung gcig btab nas bzhugs pas 'gro don ma byung / rting la ne'u thog gi sa cha der gzigs pas/ sngar lung bstan pa'i sa cha de yin par mkhyen nas/gsang phu ne'u thog gi gtsug lag khang bzhengs te bstan pa'i bya ba mdzad do/ /de'i gcung po klu khri/ klu byang / chos skyabs/