[A:95]
༈ གཉིས་པ་མཚན་ཉིད་ནི་རྩོམ་པ་པོ་ཚད་དང་ལྡན་པས་བྱས་པ་བཀའ་དེ་ལ་བརྟེན་ནས་བཀའི་དགོངས་འགྲེལ་དུ་བྱས་ཤིང༌། བྱེད་པ་ཐར་པ་ཐོབ་པ་དང་རྗེས་སུ་མཐུན་པ་སྟེ། རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་གི ༑དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླང༌། །ཞེས་སོ། ། དེ་ཡང་འཕགས་པ། ཡི་དམ་ལྷའི་ཞལ་གཟིགས་པའམ། ལྔ་རིག་པ་བླ་མ་དམ་པའི་གདམས་ངག་ཡོད་པའི་རྩོམ་པ་པོ་ཚད་དང་ལྡན་པའི་ཞེས་པས་དེ་ལ་གཞན་པའི་ངག་རྣམས་བཀའ་ལ་བརྟེན་ཞེས་པས། བཀའ་ཉིད་དང༌། ཐར་པ་ཐོབ་ཅེས་པས་མུ་སྟེགས་ཀྱི་གཞུང་རྣམས་བསལ་ཏོ།། །།
༈ གསུམ་པ་དབྱེ་བ་ལ་གསུམ་སྟེ། བཤད་བྱ་བཀའི་དབང་གིས་དང༌། བྱེད་པ་ལས་ཀྱི་དབང་གིས་དང༌། རང་གི་ངོ་བོའི་དབང་གིས་དབྱེ་བའོ། །དང་པོ་ལ་གཉིས་ལས་བཀའ་ཙམ་གྱི་དགོངས་འགྲེལ་གྱི་ཆོས་ནི་སྒྲ་དང་ཚད་མ་སྟེ་གསུང་རབ་གྱི་གཞུང་དང་དོན་གྱི་ཆ་གསལ་བར་བྱེད་པ་བརྡ་སྤྲོད་པ་བཞི་དང༌། སློབ་དཔོན་ཙནྡྲ་གོ་མིའི་སྒྲ་ཙནྡྲ་པ་དང༌། སློབ་དཔོན་ཟླ་བ་གྲགས་པའི་སྒྲ་ཀུན་ཏུ་བཟང་པོ་ལ་སོགས་པ་དང༌། སློབ་དཔོན་ཕྱོགས་ཀྱི་གླང་པོའི་ཚད་མ་ཀུན་ལས་བཏུས་པ་དང༌། ཆོས་ཀྱི་གྲགས་པས་མཛད་པའི་
རྣམ་ངེས།
རྣམ་འགྲེལ། རིགས་ཐིགས། འབྲེལ་བ་བརྟག་པ། རྒྱུད་གཞན་གྲུབ་པ། རྩོད་པའི་རིགས་པ། གཏན་ཚིགས་ཐིགས་པ་སྟེ་ཚད་མ་
སྡེ་བདུན་ལ་སོགས་པའོ།། །།
༈ གཉིས་པ་བཀའ་བྱེ་བྲག་གི་རྣམ་འགྲེལ་ལ་འཁོར་ལོ་གསུམ་ལས། དང་པོ་བདེན་པ་བཞིའི་འཁོར་ལོའི་ལྟ་བ་གང་ཟག་གི་བདག་མེད་འགྲེལ་པའི་