[A:27]zhig gang gis chags bral ba/ /bden gnyis mtshan nyid can de chos/ /chags bral nyid ni 'gog pa dang / /lam gyi bden pa dag gis bsdus/ /zhes pa gang zhig 'dod chags dang bral bar bya rgyu 'gog pa'i bden pa dang / gang gis 'dod chags dang bral bar byed pa 'phags pa rnams kyi mnyam gzhag yul can snang ba med pa'i shes rab lam gyi bden pa'o/ /yang na rtsa ba shes rab las/ sangs rgyas rnams kyis chos bstan pa/ /bden pa gnyis la yang dag brten/ / 'jig rten kun rdzob bden pa dang / /dam pa'i don gyi bden pa'o/ /zhes pas tha snyad pa dang rig pa'i shes pas rtogs bya kun rdzob dang don dam pa'i bden pa gnyis so/ /gal te don dam pa ni rtogs bya dang bstan bya ma yin te/ shes pa dang brjod pa'i yul ma yin pa'i phyir ro/ /lhag pa'i bsam pa bstan pa'i mdo las/ kun dga' bo chos ni rna bas nyan par mi nus te/ brjod du med pa'i phyir ro/ /zhes pa dang / spyod 'jug las/ don dam blo yi spyod yul min/ /zhes pas so zhe na/ brjod du med pa'i don de nyid lung gis sgro btags nas brjod pas kun rdzob tu gdul bya'i blo la rtogs pa'i chos kyi don spyi gzugs brnyan tsam 'jog cing rgyud la go ba 'phen par byed pa ste/ dbu ma la 'jug pa las/
'di 'jug pa na med ting nge 'dzin rgyal po'i mdo sde na yod/
yi ge med pa'i chos rnams ni/ / nyan dang bshad par nus ma yin/ /'on kyang des ni sgro btags nas/ /nyan dang bshad par byed pa yin/ /zhes so/ ! /gnyis pa lung gi chos ni brjod bya bden gnyis ston pa'i rjod byed ngag tshig dri ma med pa yin pas de la bzhi ste/ sgra bshad pa dang / mtshan nyid/ mtshan gzhi dang / mtshon bya'i dbye ba'o/ /dang po