[A:112]'das| |zhes pa dang / shes rab rgyas byed pa ni thos pa ste/ /bsam pa dang ni gnyis po yod gyur na/ /de nyid bsgom pa la ni rab tu sbyar/ /de la dngos grub bla na med pa 'byung / /zhes pa la sogs pa gsungs mod kyi mdor bsdus na/ gsum ste/ gti mug med pa'i dge ba yin pas/ tshogs rgya chen po rdzogs par 'gyur ba dang / sgro 'dogs bsal nas shes rab skye ba dang / kun gyis bstod cing bkur ba thob pa dang / lam bsgrub pa la gzhan gyi dring mi 'jog pa gsum gyis tshe 'dir yon tan gyi chos thob pa dang / rim gyis thos bsam sgom pa la 'jug pas mthar sangs rgyas thob pa'o/ /gsum pa skabs don la sbyar ba ni rnam bshad rig pa las/ ras 'dul ba dang / dri ma can/ mi mnyam pa dang 'dra ba| nyan pa po dang / g.yeng ba dang / rmugs pa dang sgrib pa can yin la/ tshos rtsi mi bzang ba dang 'dra ba nyes pas spyad pa'i chos yin zhing / ri mo mi mkhas pa dang 'dra ba chos smra ba po yin no/ /de lta bas na chos la skyon med khyod dam bdag la skyon srid pas khyod kyis kyang gus par nyan cing bdag gis kyang gus par bshad par bya'o/ /zhes pas shes ldan dag de lta bas na khyod kyis kyang snod kyi skyon rnams spangs te/ chos thos pa'i phan yon de dag thugs la zhog la/ tshul de lta bus legs par gsan par mdzod cig dang / kho bos kyang bshad pa'i skyon de rnams spangs te phan yon de dag yid la bzhag la tshul de lta bus legs par bshad par bya'o/ /zhes brjod do/ /mdo sde las/ legs par nyon la yid la zungs shig dang ngas bshad do/ /zhes so// //
! las dang byed pa 'bras bu yis//gzhung 'di'i skabs don rdzogs pa