[A:339]ལུང་རྣམས་ཀྱང་མཐར་ཆགས་སུ་ངེས་པར་མཛད་པའི་ངེས་ཤེས་ཀྱི་ལོ་རྒྱུས་ཐོས་པས་རྒྱལ་ཚབ་གྲགས་དོན་པར་སྡོམ་བརྩོན་ཚོགས་གཉིས་དཔལ་གྲུབ་ཀྱིས་ཞུས་ངེས་དང༌། དེ་དང་དྷཱི་ཚ་སྤྲུལ་སྐུ་གཉིས་ཀྱིས་ཤེར་ཕྱོགས་དང་མདོ་མང་སྐོར་མཁས་གྲུབ་བློ་མཆོག་རྡོ་རྗེ་ལ་ཚིག་གཅིག་ཙམ་ཡང་མ་ལུས་པར་གནང་བ་ནས་ལུང་རྒྱུན་མཚན་ཉིད་པ་ཡོད་པར་ངེས་པ་རྙེད་པས་ཡིད་དྲངས་ཏེ་འདིར་སྣང་གི་རྣམ་གཡེང་བན་བུན་རྣམས་ཀྱི་རྗེས་སུ་མ་འབྲངས་པར་འབད་པ་ཆེན་པོས་ཞུས་པ་ལ། ༈ བཀའ་དང་པོ་བདེན་བཞིའི་ཆོས་འཁོར་ལས་བྱུང་བ་འདུལ་བ་ལུང༌། བར་པ་མཚན་ཉིད་མེད་པའི་ཆོས་འཁོར་ལས་བྱུང་བ་ཤེར་ཕྱོགས། མཐའ་མ་ལེགས་པར་ཕྱེ་བའི་ཆོས་འཁོར་ལས་བྱུང་བ་དཀོན་བརྩེགས་དང་ཕལ་ཆེན། འཁོར་ལོ་གསུམ་པོ་ཅི་རིགས་པར་གཏོགས་པ་སྡེ་ཚན་ཕྱོགས་གཅིག་བསྒྲིགས་པ་མདོ་མང༌། ཐེག་པ་ཐམས་ཅད་ཀྱི་ཡང་རྩེར་སོན་པ་རྒྱུད་འབུམ་དང་ལྔ། དང་པོ་ནི། ཆོས་མངོན་པ་ལ་དགྲ་ལན་གསུམ་བྱུང་ཟེར་བའི་ལོ་རྒྱུས་དང་མཚུངས་པ་ལུང་ཞུ་བའི་འགྲེལ་པར་བྲམ་ཟེའི་རྒྱལ་པོ་རྒྱལ་ཤེས་ཀྱིས་མཆོད་རྟེན་བཤིག །དགེ་འདུན་གྱི་ཀུན་དགའ་ར་བ་དག་མེ་ལ་བསྲེགས། དགེ་སློང་མང་དུ་བསད། གླེགས་བམ་རྣམས་ཀྱང་ཞུགས་ཀྱི་ཕུང་པོར་སྦྱངས་པས་བསྟན་པ་ལ་འཕེལ་འགྲིབ་བྱུང་བར་བརྟེན། དགེ་སློང་རྣམས་ཀྱིས་ཡུལ་གཞན་དག་ནས་འདུལ་བའི་སྡེ་སྣོད་ཀྱི་གླེགས་བམ་མང་དུ་བསྡུས་ཀྱང་གཞུང་བླ་མའི་གླེགས་བམ་མ་རྙེད་པས་ནམ་ཞིག་ན་ཁ་ཆེའི་ཡུལ་གྱི་དགེ་སློང་ཞིག་གི་བློ་ནས་འདོན་པ་ཐོས་ཏེ་རྩད་བཅད་པས་དགེ་སློང་དེས་ཅུང་ཟད་གཅིག་ནི་དྲན་ཅུང་ཟད་གཅིག་ནི་མི་དྲན་ནོ་ཞེས་སྨྲས་པ་ན་དྲན་བཞིན་དུ་འདོན་དུ་བཅུག་ནས་དགེ་སློང་རྣམས་ཀྱིས་གཞུང་བླ་མ་ཡི་གེར་བཀོད། སླར་རྣམ་པར་དཔྱད་པར་བྱའོ་སྙམ་པའི་ངང་ནས་གཡེང་བས་ལུས་པ་ཡུལ་མང་པོར་འཕེལ་ཞིང༌། དེ་ལ་མ་ཚང་བ་དང་མ་དག་པ་བྱུང་བས་བྲམ་