[A:414]khang du/ bsdus pa'i rgyud thugs kyi thog nas dang/ 'grel chen la bu lugs kyi mchan dang sa bcad/ mdor bsdus dang po'i rnam bshad chos 'byung dang bcas pa/ chos tshan rnams cha tshang bar/ chos rje sku mched kyis thog drangs/ dge ba'i bshes gnyen lnga bcu tsam la rgyas pa dang/ rje bla ma dam pas mdzad pa'i Tika chen gyi lung rnams gsungs pa gsan/ gsang 'dus rgyud dang/ sgron gsal gyi rnam bshad mtha' drug rab gsal zhes pa sogs/ khong pa la mnga' ba'i gsang 'dus kyi bshad pa mang rab gsan/ dbang rdo rje phreng ba kri yas mutstsha'i lugs su mdzad pa/ sa bzang 'phags pa'i gzhung bzhin gsan/ nyi ma sbas pa'i lugs kyi sgrol ma nyer gcig gi dbang nyi shu rtsa gcig tshang ba dang/ rngog lugs dkyil 'khor bdun/ 'khor lo sdom chen dang/ sbyong rgyud bcu gnyis/ lwa ba pa dang/ mai tri pa'i bcu gsum ma sogs mang du gsan/ gzhan yang bdag chen blo gros pa'i drung du/ bsam mi khyab dang/ phyag chen yi ge med pa sogs lam skor rnams gsan zhing/ e waM gyi gdan sa gsum pa 'jam dbyangs shes rab rgya mtsho'i drung du/ gtso bor ni dgyes pa rdo rje'i rgyud gsum po mtha' chod par gsan/ bdag po mthu stobs dbang phyug glang thang du spyan drangs/ chos skyong che chung gi rjes gnang/ sgrub skor rgyas pa dur khrod bdag po/ bdud rgyal/ dkar mo nyi zla/ sa phur gyi chos skor rnams gsan te/ rgyas par ni gsan yig nyid du blta bar bya'o//
de dag ni mngon par mtho ba'i go 'phangs brnyes nas nges par legs pa'i chos la bslab sbyang ji ltar mdzad pa'i tshul gyis ye shes brnyes pa'i tshul mdo tsam du brjod zin nas//
3
gsum pa rang rgyud smin cing grol nas bstan pa dang sems can gyi don la bgyi ba ji ltar mdzad pa'i tshul/