[A:103]gcer mthong mdzub tshugs kyi ngo sprod bsnyems chod zhal gyi bdud rtsi/ snying gi bum par sib lugs su mdzad pa'i skal pa bzang po'i gnas la 'god par mdzad de/ yi ge med pa don gyi 'pho ba khyad par can gyi brgyud pa rin po che'i mtha' bral du tshud tsam gyi sgom chung pa zhig stsol ba med du byung/ brgyud pa zhes pa'i tshig bla dag kyang/ dbang bskur/ rgyud bshad/ man ngag byin pa'i rnam pa lam byed la btags pa ma yin/ 'o na gang gi brgyud pa yin zhe na/ tilli nA ro'i brgyud pa la/ gnyis med ye shes rdo rje yod/ ces gsungs pas/ brgyud pa rin po che 'di dag ni phas bu la ye shes zhu lugs byas pa'i byang chub sems gnyis su med par rtogs pa'i rang snang thig le nyag gcig/ ye rdzogs rtsa bral/ gsal bzhag gi dri ma med pa'i sangs rgyas lag bcangs kho na snying la sbyin par mdzad pa ste/ tshig gis na yams kyis don tshol ba'i brgyud pa ma yin/ don dang don lhan cig tu sbyor ba'i brgyud pa yin pa'i phyir/ chos tshul 'di la phyag rgya chen po lhan cig skyes sbyor ces nyi zla ltar grags so//
des na bka' brgyud rin po che 'di'i bzhed kyi bla ma gang las phyag rgya chen po'i rtogs pa thob pa de la rtsa ba'i bla ma zhes rnam par 'jog ste/ bsags pa rab kyi mthar phyin pa'i las can dag gis spyod yul las/ 'di na yongs su khyab pa'i rang gi kun rtog gi dra bas rang g.yogs te/ thos pa dang tshul khrims mchog 'dzin gyi nga rgyal gyis gnas lugs kyi khyim du 'jug pa'i sgo lag dam du bcad de/ gnyug ma'i gtan yul gyi grong khyer du nam yang ma phyin pa'i lam gol ba'i mthar lhung can mkhas par grags pa/ btsun