[B:28b]rtsom pa sogs la sa'i steng na 'gran pa'i zla thams cad dang bral ba las/ dzambu'i gling gi che ba dang gtan pa dang / btsun pa dang mkhas pa dang bzang ba'i skye dgu thams cad kyi gtsug gi rgyan dang cod paN dang nor bur gyur cing / rtsod pa'i dus 'dir mi mjed zhing gi ston pa mnyam med shAkya seng ge'i rgyu dang 'bras bu'i bstan pa lus yongs su rdzogs pa'i mnga' bdag chen por/ lha dang bcas pa'i 'jig rten thams cad kyi mnga' gsol te khams gsum chos kyi 'khor los sgyur ba'i rgyal po chen por [A:87]gyur pa yin no/ / 'dir smras pa/
mdo rgyud dam chos ma lus khyod kyi gsan zhing mkhyen te bdag gir mdzad pas skye dgu'i snying las chung ngur khyod nyid gcig pus bstan pa 'dzin dang 'gro don spel ba'i re bas 'tsho/ /
rgya chen gsung rab chu klung 'bum rgyas khyod blo'i rgya mtsho gang ma nus phyir da dung legs gsungs chos char 'bebs zhes rgyal ba rnams ni dag pa'i zhing na rgyun mi chad pa'i chos 'khor bskor/ /
thub pa'i bstan pa yongs su rdzogs par khyod kyi 'dzin na bdag cag rnams kyi nges par ci zhes chos kyi spyan ldan skyes chen rnams ni zhi ba'i dbyings su snyoms par zhugs te 'da' tshul bstan/ /
shAkya seng ge'i dam pa'i chos tshul snyigs ma'i mtha' 'dir khyod kyis bstan pa'i sgron me spar bas rgyal tshab byams mgon da ko zhing 'dir byon par nges snyam lha rnams dga' ba'i ca co 'byin/ /
mdo rgyud gsung rab lha yi gangA yang / /
blo gros mgul par dog pa med 'dzin pa'i/ /
rgya bod mkhas pa'i gzhung lugs chu bo rnams/ /
blo chen drang srong khyod la chu thigs mtshungs/ /
sgrib gnyis rdul gyis zhar yang ma rnyogs pa'i/ /
khyod thugs dang [A:88]ba'i me long gcig kho na/ /
phyar ba'i mod la drang nges chos phung kun/ /
rang rang ngang tshul ston la rings pa snyam/ /
mkhyen pa'i ye shes skad cig gcig gis kyang / /
shes bya'i dkyil 'khor ma lus mngon sum gzigs/ /