[B:40b]yas khang ka ba bzhi
gdung mig mang ris su bres pa'i 'phrul 'bubs dbus phyur bur gyur pa'i bzo khyad can gyi gung na/ rje btsun dam pa 'di'i thugs dam gyi gtso bo rgyud sde ma lus pa'i snying po las kyang snying por gyur pa dpal kye rdo rje'i zhal phyag yongs rdzogs kyi gser sku rje nyid kyi sku'i tshad dang mthun pa/ las sna tshogs pa'i rigs byed kyi lag sor las thon pa lta bu/ sgeg pa la sogs pa'i gar gyi nyams can mig stong dang ldan pas lan brgyar bltas kyang tshim pa'i go skabs dang bral ba/ rin po che mchog gi rgyan phreng mtshar du dngar bas spras pa gtso bor bzhugs pa'i phyogs mtshams [A:130]brgyad du 'khor gyi lha mo dkar mo dang / chom rkun ma dang / ro langs ma dang / za phod ma dang / sbos mo dang / ri khrod ma dang / gdol pa mo dang / g.yung mo rnams kyang gser sku cung gzhon pas bskor te bzhugs so/ / de dag gi khri'i 'og na yi dam 'di nyid kyi rdul mtshon gyi dkyil 'khor rje bla mas sgrub cing mchod pa dus rgyun ldan lta bur gnang ba'i ngo mtshar ba khyad par gyi bzhugs sgam dang bcas te bzhugs su gsol ba/ gzhan yang khru gang ba'i gser sku la/ bcom ldan 'das kye rdo rje/ dpal dus kyi 'khor lo/ 'khor lo bde mchog rnams kyi sku zhal phyag yongs rdzogs bzhugs khang sogs bzo'i khyad par dang bcas pa'o/ / gtso bo'i sku mdun rgyud sde rnams kyi dgongs pa mthar thug dpal sa skya pa'i rje btsun rnams kyi grub pa'i mtha' legs par bshad pa ji lta ba bzhin gyi dgyes pa rdo rje'i rten dang brten par bcas pa'i blos bslang chos kyi dbyings kyi dkyil 'khor mngon sum pa lta bu'o/ / de nas ri mor bkod pa la/ gung gi dbus na dgyes pa rdo rje thod pa can/ gur rigs bsdus pa'i rdo rje mkha' 'gro la sogs pa mkha' 'gro lnga/ de'i [A:131]g.yas phyogs nas rim pa bzhin/ dpal sangs rgyas thams cad dang mnyam par sbyor ba/ dpal dus kyi 'khor lo/ dpal gsang ba 'dus pa mi skyod rdo rje dang 'jam pa'i rdo rje/ dpal gshin rje'i gshed dmar po/ dpal rdo rje 'jigs byed/ dpal gshin rje'i gshed dgra nag po/ dpal phyag na rdo rje 'khor lo chen po/ dpal yang dag rnams so/ /