[B:45b]dkyil 'khor sum bcucu phyin gyi sgrub mchod/ chos skyong gong 'og gi bskang gso sogs dang bcas pa'i phyag len gyi rim pa/
sa ga'i zla ba la dpal dus kyi 'khor lo gtso bor gyur pa'i bde mchog mkha' 'gro rgya mtsho/ sangs rgyas mnyam sbyor/ rdo rje gdan bzhi rnams kyi sgrub mchod/ gro bzhin gyi zla ba la dpal rtse sogs rnal 'byor rgyud gtso bor gyur pa'i dkyil 'khor bcu gcig tsam gyi sgrub mchod/ mgo'i zla ba'i yar ngo mar ngo'i brgyad gnyis la dpal mgon zhal bzhi pa'i [A:149]gtor ma zhi drag gi cho ga gtor skyong dang gtor chen rnam pa gnyis/ rgyal gyi zla ba la bstan pa spyi'i dus rim chen mo bcom ldan 'das rdo rje phur pa'i sgrub mchod dang / chos skyong gi bskang gso mdos gtor sogs kyi sgo nas phyag bzhes gzhan las khyad par du 'phags pa rgyas par mdzad do/ /
gzhan yang bla ma so so'i lo dus kyi mchod pa dang / de dag gi rgyun gyi mchod thabs gang la gang 'os so sor sbyor ba sogs/ mdor na phan bde'i 'byung gnas sangs rgyas kyi bstan pa nyag gcig thugs la brnags pa'i rnam par 'phrul pa kho na'o/ / phyis dgon lag dben gnas kyi tshul du/ bde chen chos 'khor zhes pa'i gtsug lag khang rten dang brten par bcas pa'i mgon khang du chos skyong che ba'i sku nyid rje btsun dam pa des phyag bris las grub pa sogs bkod pas khyad par du 'phags pa gcig kyang bsgrubs par mdzad do/ /
'dir smras pa/
bstan pa'i nyin byed dge legs 'od stong can/ /
snyigs dus log spyod sgra gcan gyis bsgribs pas/ /
'gro kun lam log zhugs la mi bzod pa'i/ /
shugs drag snying rje'i rgya mtsho gyen du 'phyur/ /
de tshe snying [A:150]stobs phrag par lus can gyi/ /
phan bde'i khur chen len bzod khyod thugs mkhar/ /
lhag bsam zla ba stong phrag shar ba las/ /
mdzad bzang 'od dkar phung pos sa chen bkang / /
rdzogs sangs rgyas kyi bstan pa yid bzhin nor/ /
rtsod dus mun sprul 'dam rdzab kyis sbags pa/ /
chad rtsod rtsom pa'i byi dor gyis sbyangs nas/ /
bshad sgrub rgyal mtshan rtse mor khyod kyis bzung / /
gser ri'i phreng bas bskor ba'i lhun po kun/ /
kun nas skyengs par byed pa'i gtsug lag khang / /