[A:222]མར་ལ་སྤྱོད། །དེ་ལྟར་ངོ་མཚར་ཆེ་བའི་གནས་མཆོག་དེར། །རིན་ཆེན་རྒྱན་གྱིས་མཛེས་པའི་ཕོ་བྲང་ན། །མི་རྗེ་ལྷ་ཡིས་མཛད་པའི་རྒྱལ་པོ་དེ། །འཕགས་པ་ཐུགས་རྗེ་ཆེན་པོ་དངོས་སུ་འདུག །ཐབས་མཁས་ཐུགས་རྗེ་ལྡན་པའི་རྒྱལ་པོ་ཡིན། །མི་དགེ་བཅུ་སྤངས་དགེ་བཅུའི་ཁྲིམས་ལ་གནས། །མངའ་ཐང་དཔལ་འབྱོར་འདོད་རྒུའི་དཔལ་ལ་སྤྱོད། །ཡོན་ཏན་མཐའ་ཡས་རྒྱལ་པོ་ལྷ་ཡི་སྲས། ། དཔའ་མཛངས་ཀུན་འཛོམ་འཁོར་རྣམས་བྱང་ཆུབ་སེམས། །དེ་འདྲའི་གནས་སུ་བུ་མོ་ཁྱོད་སོང་ཤིག །མཛེས་མ་ཁྱོད་ཀྱི་བསོད་ནམས་བསགས་པའི་རྟེན། ། བདག་གི་མཆོད་གནས་སྟོན་པའི་སྐུ་གཟུགས་འདི། །ཡོན་བདག་ལྷ་དབང་བརྒྱ་བྱིན་ཁོང་གིས་མཛད། །རྒྱུ་ནི་རིན་ཆེན་རྣམ་པ་བཅུ་ལས་གྲུབ། །འདི་ཡི་བཟོ་བོ་བི་ཤྭ་ཀརྨས་མཛད། །རབ་གནས་སངས་རྒྱས་ཉིད་ཀྱིས་མཛད་པ་ལགས། །དེ་ལྟར་འགྲན་མེད་རྒྱལ་བའི་སྐུ་གཟུགས་འདི། །མཐོང་ཐོས་དྲན་རེག་གསོལ་བ་བཏབ་གྱུར་པས། །སངས་རྒྱས་མྱུར་དུ་ཐོབ་པར་རྒྱལ་བས་གསུངས། །དེ་ལྟར་ཕན་བདེ་འབྱུང་བའི་ཇོ་བོ་འདི། །བདག་གི་སྙིང་དང་འདྲ་བར་ཕངས་ན་ཡང༌། །མཛེས་པའི་བུ་མོ་ཁྱོད་ལ་བདག་གིས་བརྫངས། །རིན་ཆེན་བང་མཛོད་མང་པོ་ནོར་གྱི་གཏེར།། བདག་ལ་གཅེས་པའི་རིན་ཆེན་མང་པོ་ཡང༌། །མཛེས་མའི་བུ་མོ་ཁྱོད་ལ་བདག་གིས་བརྫངས། །གསེར་གཡུ་བརྩེགས་པའི་ཡིག་ཚང་ཆེན་མོ་དང༌། །གཙུག་ལག་ཡི་གེ་སུམ་བརྒྱ་དྲུག་ཅུ་དང༌། །གསེར་གཡུ་རྒྱན་གྱི་རྣམ་པ་མང་པོ་ཡང༌། །མཛེས་པའི་བུ་མོ་ཁྱོད་ལ་བདག་གིས་བརྫངས། །གཡོས་སྣ་ཟས་ཀྱི་རྣམ་པ་མང་པོ་དང༌།། བཏུང་བ་སྐོམ་གྱི་སྦྱོར་ཐབས་མང་པོ་དང༌། །གསེར་སྒ་གཡུ་ཡི་ཀ་ལེབ་ཅན་ལ་སོགས། །མཛེས་པའི་བུ་མོ་ཁྱོད་ལ་བདག་གིས་བརྫངས། །ཟ་འོག་སྟན་ཐུལ་སེང་