[A:223]གེ་བྱ་བརྒྱད་མ། །ལྗོན་ཤིང་ཆོ་ལོ་ནོར་བུ་རིས་སུ་བྲིས། །རྒྱལ་པོ་ངོ་མཚར་སྐྱེ་ཕྱིར་ཁྱོད་ལ་བརྫངས། །རྒྱ་ཡི་གབ་ཙེ་གཙུག་ལག་སུམ་བརྒྱ་པོ། །ལེགས་ཉེས་སྟོན་པའི་ལས་ཀྱི་མེ་ལོང་ཡང༌། །མཛེས་པའི་བུ་མོ་ཁྱོད་ལ་བདག་གིས་བརྫངས། ། བཀོད་པ་རིག་བྱེད་མཛེས་པར་བྱེད་པ་ཡི། །ཡིད་འོང་རྒྱན་གྱི་ཁྱད་པར་འཕགས་པ་དང༌། །བཟོའི་རིག་བྱེད་དྲུག་ཅུ་ཐམ་པ་ཡང༌། །མཛེས་པའི་བུ་མོ་ཁྱོད་ལ་བདག་གིས་བརྫངས། །བཞི་བརྒྱ་རྩ་བཞིའི་ནད་རྣམས་འཇོམས་པའི་སྨན། ། བརྟག་ཐབས་བརྒྱ་དང་དཔྱད་ལྔ་སྤྱད་དྲུག་དང༌། །སྦྱོར་སྡེ་བཞི་ལ་སོགས་པ་བདག་གིས་བསྐུར། །ཚེ་གཅིག་དྲོས་པའི་དར་གོས་ཟ་འོག་སོགས། ཁ་དོག་སྣ་ཚོགས་ལྡན་པའི་རྒྱན་གོས་ཀྱང༌། །སྟོང་ཕྲག་ཉི་ཤུ་བུ་མོ་ཁྱོད་ལ་བརྫངས། ། རིགས་གཟུགས་ལྟ་ན་སྡུག་ཅིང་མཛེས་པ་ཡིན། །སེམས་མཐུན་སྐྱོ་གྲོགས་བྱེད་པའི་བུ་མོ་ཡང༌། །ཉི་ཤུ་རྩ་ལྔ་ཁྱོད་ཀྱི་འཁོར་དུ་བརྫངས། །ཨེ་མ་འབྲལ་བར་མི་ཕོད་བུ་མོ་ཁྱོད། །བརྩེ་བའི་སྙིང་གཏམ་ཡིན་པས་སེམས་ལ་ཞོག ཁ་བ་ཅན་གྱི་མི་རྣམས་འདུལ་དོན་དུ། ཁྱོད་ཀྱིས་བྱ་བ་སྤྱོད་ལམ་འདི་བཞིན་གྱིས། །ལྟ་བ་ཡངས་ཤིང་སྤྱོད་ལམ་ཞིབ་བར་མཛོད། །ཕྱི་ནང་བྱ་བ་ཀུན་ལ་མཁས་པར་མཛོད། །ངག་འཇམ་སྨྲ་མཁས་གཞི་མ་ལེགས་པར་མཛོད། །རྗེ་ལ་གུས་ཤིང་འཁོར་ལ་བྱམས་པར་མཛོད། ཁྲེལ་ཡོད་ངོ་ཚ་བག་དང་ལྡན་པར་མཛོད། །ཅེས་པ་ལ་སོགས་པའི་འཇིག་རྟེན་མི་ཆོས་ལ་དགོས་པའི་བསླབ་བྱ་དཔག་ཏུ་མེད་པ་མཛད་དོ། །ཡབ་ཀྱིས་ཕྱག་ནས་འཇུས་ཤིང་འབྲལ་མི་ཕོད་པ་ལྟར་ཡོད་ན་ཡང༌། བོད་དུ་འགྲོ་དགོས་པར་དགོངས་ཏེ། ལྷ་གཅིག་ལ་རྫོང་བསམ་གྱིས་མི་ཁྱབ་པ་མཛད་དོ། །དེ་ནས་ལྷ་གཅིག་གཡོག་མོ་དེ་དང་འགྲོགས་ཏེ། བློན་པོ་མགར་གྱི་རྩར་བྱུང་ནས།