[A:224] བློན་པོ་ཆེན་པོ་ཁྱེད་ཀྱི་ཡུལ་དུ་ཇོ་བོ་ཤཱཀྱ་ཡང་གདན་འདྲེན། ནོར་དཔག་ཏུ་མེད་པའང་ཁྱེར་ནས་ཁྱེད་ཀྱི་ཡུལ་དུ་འགྲོ། ཁྱེད་ཀྱི་ཡུལ་ན་ས་ཁམ་པ་ཡོད་དམ། རྡོ་སྲིན་ཟན་ཡོད་དམ། ཤིང་སེ་བ་ཡོད་དམ། རྩ་དྲེད་མ་ཡོད་དམ། ཉུང་མ་ཡོད་དམ། ཟེར་བ་ལ། མགར་ན་རེ། གཞན་རྣམས་ཡོད། ཉུང་མ་མེད་བྱས་ནས། ལ་ཉུང་གི་ས་བོན་ཁྱེར། དེ་ནས་ཤིང་རྟའི་འཁོར་ལོ་བྱས། དེའི་སྟེང་དུ་ཇོ་བོ་ཤཱཀྱ་བཞུགས། འཁོར་ལོ་དེ་རྒྱ་ནག་ན་སྟོབས་ཆེ་བའི་གྱད་ལྷ་དགའ་དང༌། ཀླུ་དགའ་གཉིས་ལ་འདྲེན་དུ་བཅུག་གོ །གཞན་ཡང་རིན་པོ་ཆེ་དང༌། དར་དང་གོས་དང༌། རྒྱན་དང༌། འཕྲལ་གྱི་ཡོ་བྱད་རྣམས་བཀལ་བའི་རྟ་དང༌། དྲེའུ་རྔ་མོ་ལ་སོགས་པ་མང་པོ་བརྫངས་སོ། །བོད་བློན་རྣམས་ལའང་སྟོན་མོ་གནང་སྦྱིན་དཔག་ཏུ་མེད་པ་མཛད་དོ༑ ༑དེར་ལྷ་གཅིག་ཀོང་ཇོ་ཡང་རིན་པོ་ཆེའི་རྒྱན་མང་པོས་བརྒྱན་ནས། མཛེས་པའི་བུ་མོ་ཉི་ཤུ་རྩ་ལྔའི་འཁོར་དང་བཅས་པ་རང་རང་གི་རྟ་ལ་ཆིབས་ནས། ཡབ་ཡུམ་བློན་པོའི་ཚོགས་དང་བཅས་པས་སྐྱེལ་ཐུང་བྱས། ཡབ་ཡུམ་གཉིས་ཀྱི་ཐུགས་ལ་འཕྲེང་བཞིན་དུ། འཇིག་རྟེན་མི་ཆོས་ལ་ཕན་པའི་བསླབ་བྱ་གལ་ཆེ་བ་དཔག་ཏུ་མེད་པ་མཛད་ནས་བོད་དུ་ཆས་སོ། །དེར་སྐྱེལ་ཐུང་ལ་བྱོན་པའི་གྲལ་ལ། བློན་པོ་འབྲི་སེ་རུ་གོང་སྟོན་ཟེར་བ་དེས། བློན་པོ་མགར་ལ་ཕྲག་དོག་བྱས་ནས། འདིར་ལྷ་གཅིག་གི་ཚབ་ཏུ། བློན་པོ་རིག་པ་ཅན་ཅིག་བསྡད་ན། རྒྱ་བོད་གཉིས་མཐུན་འོང་ཟེར་ནས། བློན་པོ་མགར་ལ་མིག་ཅེར་ཏེ་བལྟས་པ་དང༌། རྒྱལ་པོའི་ཞལ་ནས་ངའི་ལྷ་གཅིག་མཛངས་མ་དེ། ཁྱེད་བོད་ཀྱིས་ཐོབ་པས་ང་ལ་མི་ཚབ་ཏུ་མགར་སྡོད་དགོས་གསུངས་སོ། །དེར་བློན་པོ་མགར་གྱིས་ཀྱང༌། སེ་རུ་གོང་སྟོན་གྱིས་ཕྲག་དོག་བྱས་པར་གོ་ནས། རྒྱ་བོད་གཉིས་མཐུན་པ་ངས་བྱེད་དོ་ཟེར་ནས་