[A:225]སྡོད་པར་བྱས་སོ། །དེར་མགར་གྱིས་ཐོན་མི་དང་ཉང་གཉིས་ཟུར་དུ་ཁྲིད་ནས། ང་རྒྱ་ནག་ཏུ་ཟླ་བ་ལྔ་ལས་མི་སྡོད། དེའི་བར་ངན་འཁྱོལ་ཚད་སྐྱེལ། ཁྱེད་རྣམས་ཀྱིས་རྫུས་མའི་སྤྲང་པོ་ཅིག་ངའི་རྩར་ཐོང་བྱས་སོ། །དེར་བློན་པོ་ཐམས་ཅད་ཇོ་བོ་དང་ལྷ་གཅིག་ལ་བསྐོར་ཏེ་བོད་དུ་སོང་ངོ༌། །དེར་རྒྱ་ནག་ཏུ་མགར་གཅིག་པུར་ལུས་ཏེ། རྒྱལ་པོས་མགར་ལ་བུད་མེད་ཅིག་བླངས། གཞི་མ་རབ་ཅིག་ཕོག་ནས་བཞག་གོ །དེ་ནས་མགར་ཡང་ཤིན་ཏུ་སྐྱོ་ཞིང༌། བློ་མ་བདེ་བར་གྱུར་ནས་བུད་མེད་དེའི་རྩར་མ་ཕྱིན། ལྟོ་ཡང་མ་ཟོས་ཏེ། ལུས་སྔོ་ལ་རིད་པར་བྱས། མལ་འོག་ཏུ་ཀོ་བ་རུལ་པ་བཞག་ནས། ལུས་ལ་དྲི་མི་ཞིམ་པ་ཡོད་པ་བྱས། འགྲམ་པ་གཡས་སུ་མཚལ་བཅུག གཡོན་དུ་རམས་བཅུག་ནས། མལ་གྱི་ཕྱི་རོལ་རྣག་ཁྲག་གི་ལུད་པས་བཀང་སྟེ་བཞག་གོ །དེར་ཆུང་མ་རྒྱ་མོ་དེ་ན་རེ། བློན་པོ་ཆེན་པོ་ཁྱེད་ཀྱི་ལུས་ལ་དྲི་མི་ཞིམ་པ་ཡང་སྣོམ་གྱིན་འདུག མདོག་ཀྱང་སྔོ་བར་འདུག་པ་ཅི་ཉེས་ཟེར་རོ། །བློན་པོ་ན་རེ། ང་ལ་ཚད་པའི་ནད་བྱུང་བ་ཁྱོད་ཀྱིས་མ་ཚོར་རམ་ཟེར་བས། དེར་མོས་རྒྱལ་པོ་ལ་ཞུས་པས། རྒྱལ་པོ་ཡང་ཐུགས་མ་བདེ་བར། བློན་པོའི་རྩར་བྱོན་ཏེ། བློན་པོ་ཆེན་པོ་ཅི་བྱུང་གསུངས་པས། བློན་པོ་ན་རེ། བདག་ཚད་པའི་ནད་ཀྱིས་ཐེབས་གདའ་ལགས་ཟེར་ནས་ལུད་པ་ཅིག་བསྐྱུར་བས་རྣག་ཁྲག་གི་མདོག་ཏུ་འདུག ལུས་ཀྱི་དྲི་མི་ཞིམ་པ་ཡང་ཚོར་ཏེ། རྒྱལ་པོའི་ཞལ་ནས། སང་སྨན་པ་མཁས་པ་ཞིག་ཡོད་པ་ཁྲིད་ལ་འོང་གིས་གསུངས་ནས་བཞུད་དོ༑ ༑དེར་ཆུང་མ་རྒྱ་མོ་དེ་ལ། བློན་པོ་ན་རེ། ཁྱོད་བུད་མེད་གྲིབ་ཆེ། སང་སྨན་པ་བྱུང་ཙ་ན། ངའི་རྩ་མི་རྟོགས་པས། ཁྱེད་རང་ཁྱིམ་མཚེས་གྱི་གན་དུ་ཉོལ་བར་སོང་ཞིག་བྱས་ནས་གཏོང་ངོ༌། །དེའི་ཤུལ་དུ། བློན་པོས་ས་ཕག་གི་ཁྲི་མཐོན་པོ་ཅིག་