[A:226]བརྩིགས་ནས། གདུང་མ་ལ་ཐི་གུ་བཏགས། ཕོ་མཚན་ཐི་གུས་བཅིངས་ཏེ། སྤྱི་བོ་ས་ལ་བཙུགས་ནས་རྩ་ཐམས་ཅད་འཁྲུག་ཏུ་བཅུག་གོ །དེའི་སང་རྒྱལ་པོས་སྨན་པ་ཁྲིད་བྱུང་སྟེ། སྨན་པ་མཁས་པ་དེས་རྩ་བལྟས་པས། སྨན་པ་ན་རེ། ལུས་ཀྱི་རྩ་ཐམས་ཅད་འཁྲུགས་པར་གྱུར་པས་ན་བརྟག་པར་དཀའ་སྟེ། རླུང་ལས་གྱུར་པ་ཡང་མ་ཡིན། མཁྲིས་པ་ལས་གྱུར་པ་ཡང་མ་ཡིན། བད་ཀན་ཀྱང་མ་ཡིན། འདུས་པའང་མིན་ཏེ། བྱིས་པའི་གདོན་ཆེན་བཅོ་བརྒྱད་ཀྱི་ནད་ཀྱང་མ་ཡིན། བགེགས་རིགས་སྟོང་ཕྲག་བརྒྱད་ཅུའི་ནད་ཀྱང་མ་ཡིན་ཏེ། འབྱུང་པོའི་གདོན་གྱི་ནད་ཀྱང་མ་ཡིན། སེམས་མ་བདེ་བ་སྙིང་གི་དཀྱིལ་དུ་ཕོག་པའི་གཅོང་ཅིག་འདྲ་ཏེ། སྨན་དཔྱད་རིམ་གྲོ་གང་གིས་ཀྱང་ཕན་པར་དཀའ་ཟེར་རོ། །དེར་རྒྱལ་པོའི་ཞལ་ནས། སྨན་པ་དེ་ལ་སང་གནང་ལན་རེ་ཤོག་ལ་ལྟོས་ཤིག་གསུངས་སོ། །ཡང་སང་སྨན་པ་བྱུང་དུས། བློན་པོས་མཆན་དུ་ཞིམ་བུ་བཅུག དེའི་ལག་པ་ལ་ཐི་གུ་བཏགས། ཐིག་སྣ་ལ་རྩ་བལྟར་བཅུག་པས། གཅན་གཟན་ཐ་མ་ཞིག་གི་རྩ་ལས་མི་འདུག་ཟེར་ཏེ་སོང་ངོ༌། །ཡང་བློན་པོས། དེའི་སང་བྱ་ཕོ་ཅིག་མཆན་དུ་བཅུག་ནས། དེའི་ལག་པ་ལ་ཐི་གུ་བཏགས། ཐིག་སྣ་ལ་རྩ་བལྟར་བཅུག་པས། འདབ་ཆགས་ཐ་མ་ཞིག་གི་རྩ་ལས་མི་འདུག་ཟེར་རོ། །དེ་ནས་རྒྱལ་པོ་ཡང་ཐུགས་ཤིན་ཏུ་མ་བདེ་བར། བློན་པོ་ཆེན་པོ་ཁྱེད་རང་རིག་པ་ཅན་ཡིན་པས་ཐབས་ཨེ་ཡོད། དེའི་ཐབས་གང་འགྲུབ་བྱེད་གསུངས་པས། བློན་པོའི་བསམ་པ་ལ། ད་ནི་གླགས་རྙེད་པར་འདུག་བསམས་ནས། རྒྱལ་པོ་ཆེན་པོ་ངའི་ནད་འདི་ཁྱེད་ཀྱིས་ང་བཟུང་བས། བོད་ཀྱི་ལྷ་སྲུངས་མ་དགའ་བ་ཡིན། ང་བོད་ཀྱི་རི་མཐོང་བའི་རི་མཐོ་བ་ཞིག་གི་ཁར་ཕྱིན་ནས་ལྷ་གསོལ་ན་ཕན། དེའི་རྫས་ལ། དར་ཟབ་བསྲེགས་པའི་ཐལ་བ་