[A:227]རྐྱལ་པ་གང༌། ལུག་བསད་པའི་མཆེར་པའི་ཁྲག་གྲོད་པ་གང༌། སོལ་བའི་མདུང་ཤིང་གས་ཆག་མེད་པ་འདོམ་གསུམ། རྟ་མོག་རོ་མགོ་དམར་བ་ཞིག་རྣམས་དགོས། དེ་རྣམས་ནི་རྙེད་པར་དཀའ་སྟེ་མི་འཛོམ། རྒྱལ་པོ་ཡང་གསན་པར་དཀའ། ལར་དེང་ང་འཆི་ལས་ཆེ། ཤི་བས་མི་ཆོག་པར་ངའི་རྗེས་སུ་ལྟས་ངན་པ་བཅོ་བརྒྱད་འོང༌། རྒྱ་བོད་གཉིས་འབྲེལ་ཆད། བོད་ཀྱི་རྒྱལ་པོ་ལ་མངོན་ཤེས་ཡོད་པས་ང་ཤི་བ་མཁྱེན་ནས། དམག་བཏང་ནས། རྒྱ་ཡུལ་ཐམས་ཅད་ཕུང་བར་འོང༌། ས་ཐག་རིང་ས་འདིར་སླེབ། གྲོགས་བློན་པོ་རྣམས་ཀྱིས་བསྐྱུར། ལུས་ལ་ནད་ཀྱིས་ཐེབས། ང་རང་གི་རྒྱལ་པོ་དང༌། ཉེ་དུ་མཛའ་བཤེས་རྣམས་ཡིད་ལ་དྲན་ཀྱང་བྱ་ཐབས་མེད་པར་སོང༌། རང་གི་ནོར་རྫས་བཟའ་བཏུང་ལོངས་སྤྱོད་ཀྱིས་ཕན་པར་དཀའ་སྟེ། ཚེ་འདི་ཡང་རྨི་ལམ་ལྟ་བུར་འདུག་གོ་ཟེར་ནས། མགོ་ཧྲིལ་གྱིས་གཏུམ་ནས་ཉལ་སོང་ངོ༌། །དེར་རྒྱལ་པོ་ཡང་ཤིན་ཏུ་སྐྲག་པར་གྱུར་ནས། ཁྱེད་ལ་ཕན་པའི་ཐབས་གང་འགྲུབ་བྱེད། ལྷོད་དེ་ཉོལ་ཅིག་གསུང་ནས་བཞུད་དོ།། དེར་རྒྱལ་པོས་ནགས་ཐམས་ཅད་ལ་མེ་བརྒྱབ་པས། སོལ་བའི་མདུང་ཤིང་ཀྱང་མ་བྱུང༌། དར་ཟབ་ཐམས་ཅད་བསྲེགས་པས། ཐལ་བ་རྐྱལ་པ་ཕྱེད་ཀྱང་མ་བྱུང༌། ལུག་ཐམས་ཅད་བསད་པས་མཆེར་ཁྲག་ཕོར་པ་ཕྱེད་ཀྱང་མ་བྱུང༌། རྟ་མོག་རོ་མགོ་དམར་དེ་རྙེད་དོ། །དེར་རྒྱལ་པོའི་ཞལ་ནས། རྫས་གཞན་རྣམས་ནི་མ་རྙེད། རྟ་མོག་རོ་མགོ་དམར་དེ་རྙེད་ཡོད་དོ་གསུངས་པས། བློན་པོ་ན་རེ། རྫས་གཞན་རྣམས་མ་རྙེད་ན་ཐབས་ཟད། རྟ་མོག་རོ་མགོ་དམར་ལ་ངའི་རོ་རྟ་གྱིས་ལ་ང་བསྐྱོན། རྒྱ་ཡུལ་ན་བཟང་བའི་རྟ་ཞིག་ལ་ངའི་རོ་ཟས་དང༌། རོ་གོས་བཀལ་ནས་བོད་ཀྱི་རི་མཐོང་བའི་སར་ལྷ་གསོལ་དུ་འགྲོའོ་ཟེར་རོ། །དེར་ལྷ་གསོལ་བར་