[A:228]འགྲོ་བའི་གྲབས་བྱེད་གིན་ཡོད་ཙ་ན། རྒྱལ་པོའི་ཞལ་ནས། བློན་པོ་ཆེན་པོ་ནམ་ཟླ་དཔྱིད་ཀར་སོང༌། སོ་ནམ་བྱེད་རན་པས་ཇི་ལྟར་བྱས་ན་ལེགས། ཁྱོད་རིག་པ་ཅན་ཡིན་པས་སྟོན་ཅིག་གསུངས་སོ། །དེར་བློན་པོ་ན་རེ། ངའི་བོད་ཡུལ་ན་ས་བོན་ཐམས་ཅད་སླ་ངའི་ནང་དུ་སེར་ཙམ་བརྔོས་ནས་བཏབ་པས། ལོ་ཚན་ཆེ་བ། གཟུགས་རིང་བ། ཟླ་བ་གསུམ་སོང་དུས་སྨིན་འོང་ཟེར་བས། དེར་རྒྱལ་པོའི་ཞལ་ནས། བོད་ཀྱི་ལུགས་སུ་གྱིས་ཤིག་གསུངས་ནས། ཁྲིམས་ཀྱི་རྔ་བོ་ཆེ་བརྡུངས་ཏེ། ཐམས་ཅད་ཀྱིས་ནས་བརྔོས་ནས་ཡོས་ཞིང་ལ་བཏབ་བོ། །དེར་བློན་པོས་རང་གི་ལུས་གུད་པ་དེ་སོས། ལྷ་གསོལ་བར་འགྲོ་བའི་གྲབས་བྱེད་གིན་ཡོད་དུས། བོད་བློན་རྣམས་ཀྱིས་རྫུས་མའི་སྤྲང་པོ་གཅིག་བཏང་བྱུང་ངོ༌། །དེར་བློན་པོས་ལོག་པའི་སྐད་བྱས་ཏེ། ཐག་རིང་གི་ར་ཕོ་རྒྱ་བོ་ལ་ངོ་ཤེས་མི་བྱའོ། ཁ་རོག་སྡོད་ལ་ཀུ་ཅོ་ཐོང༌། །ནག་མོ་ལྕགས་མཁར་ཐུག་ནས་ཡོད། །ལུང་པ་ཕུ་བརྡུག་མདའ་བརྡུགས་སུ། །ཐུ་རུ་ཅོ་བྲགས་ཁོང་ལ་ཞོག །དར་དཀར་དྲིལ་ལ་དར་ནག་བསྐྱོད།། ཟླ་བས་ཉི་མའི་རྩ་རུ་སླེབ། །ཟེར་ནས། དེར་སྤྲང་པོ་དེ་ལོག་གོ །སྤྲང་པོ་དེས་ཁོང་རྣམས་ལ་བཤད་པས་མ་གོ་བར། རྒྱ་མོ་ཀོང་ཇོས་གོ་ནས་འདི་སྐད་ཟེར་ཏེ། བློན་པོ་དེས་རྒྱ་ནག་ཏུ་ངན་ཆེན་པོ་བྱས་ཡོད་པར་འདུག ཐག་རིང་གི་ར་ཕོ་རྒྱ་བོ་ལ་ངོ་ཤེས་མ་བྱེད་ཟེར་བ་དེ། ཁོང་རང་རྒྱལ་པོ་སྨ་ར་ཅན་ལ་ལབ་མ་ཤོད་བྱ་བ་ཡིན། ད་ལེན་ཁ་རོག་སྡོད་ལ། བོད་བློན་རྣམས་ལ་ཤོད་བྱ་བ་ཡིན། ནག་མོ་ལྕགས་མཁར་ཐུགས་ནས་ཡོད་ཟེར་བ་དེ། ས་བོན་ཡོས་སུ་བརྔོས་ནས་འདེབས་བཅུག་བྱ་བ་ཡིན། ལུང་པ་ཕུ་བརྡུགས་མདའ་བརྡུགས་སུ། ཐུ་རུ་ཅོ་བྲགས་ཁོང་ལ་ཞོག་བྱ་བ་དེ། དོང་པར་མདའ་མང་པོ་ཆུག་བྱ་བ་ཡིན། དར་དཀར་དྲིལ་ལ་དར་