[A:229]ནག་བསྐྱོད་བྱ་བ་དེ། ཉིན་མོ་བསྡད་གིན་མཚན་མོ་འོང་ཟེར་བ་ཡིན། ཟླ་བས་ཉི་མའི་རྩར་སླེབ་ཟེར་བ་དེ། ངས་ཁྱེད་རྣམས་ཀྱི་རྩར་མགྱོགས་པར་སླེབ་བྱ་བ་ཡིན་ཟེར་རོ། །དེར་བློན་པོ་མགར་བོད་ཀྱི་རི་མགོ་མཐོང་བའི་སར་ལྷ་གསོལ་དུ་འགྲོ་བའི་ཆས་ལ་རྟ་མོག་རོ་མགོ་དམར་ལ་ཞོན། རྟ་གཞན་ཞིག་ལ་རྒྱགས་དང་གོས་བཀལ། ཤ་སྐམ་ལ་ཚྭ་ཆུ་བྱུགས་པ་མང་པོ་ཁྱེར། རྒྱལ་པོས་བློན་པོ་བོད་དུ་བྲོས་དོགས་ནས། གྱད་མི་བཞི་བསྲུང་དུ་བཏང་ངོ༌། །དེར་མགར་མེད་པའི་ཤུལ་དུ། རྒྱལ་པོ་ན་རེ། ངའི་ལྷ་གཅིག་དེ་སྟོན་མཁན་ཞིག་ཡོད་ཐག་ཆོད་པས། རྩིས་གྱིས་ཤིག་གསུངས་སོ། །དེར་རྩིས་བྱས་པས་འདི་སྐད་ཟེར། རི་གསུམ་གྱི་སྟེང་ན་མཚོ་ཆེན་པོ་ཅིག་འདུག མཚོ་དེའི་ནང་ན་བྱ་སྣ་ཚོགས་འདུག དེའི་སྟེང་ན་ཐང་དམར་ཅེམ་མེ་བ་ཞིག་གི་ཁ་ན། བུད་མེད་ཡིན་པ་ལ་མགོ་དང་ལུས་མཉམ་པ། མགོ་ལུས་ཐམས་ཅད་མིག་གིས་གང་བ། ཟངས་ཀྱི་མཆུ་ཡོད་པ་ཞིག་གིས་བསྟན་འདུག་ཟེར་བས། རྒྱལ་པོ་ཐུགས་མ་ཆེས་པར་རྩིས་ཡིག་ཐམས་ཅད་མེ་ལ་བསྲེགས། སྤོར་ཐང་བརྒྱད་ཅུ་སྐོར་ནི་བོད་དུ་བསྐུར་ནས་མེད་དོ། །དེར་བློན་པོ་བོད་ཀྱི་རི་མཐོང་བའི་ས་རུ་སླེབ། ལྐོག་ཏུ་ཆང་མང་པོ་ཉོས་ནས་སྦས། ཤ་སྐམ་ཀྱང་ཞིམ་པོ་བྱིན་ནས། ངའི་ནད་ལ་ཕན་པ་ཡིན་པས་ཟོ་ཅིག་བྱས་ཏེ། ལྷ་གསོལ་ལོ༑ ༑དེ་ནས་གྱད་བཞི་པོས་ཁ་སྐོམ་ནས་བཟོད་ཐབས་མེད་པར་བྱུང་བ་དང༌། ཆང་མང་པོ་བྱིན་པས། ཁོང་རྣམས་ར་རོ་སྟེ་དབང་པོ་མེད་པར་གྱུར་པ་དང༌། བློན་པོས་ཁོང་བཞི་པོའི་རྟའི་སུག་པ་བྲགས། མཚོན་ཆ་བཅག ཁོང་རང་རྟ་མོག་རོ་མགོ་དམར་ལ་ཞོན། རྟ་གཞན་དེ་ཁྲིད་ནས་འདི་སྐད་ཟེར་རོ། །དར་ཟབ་མེ་ལ་བསྲེགས་པའི་ཐལ་བ་དེ། །རྒྱལ་པོ་ཉེ་རིང་ཅན་དེའི་ན་བཟའ་མཛོད། །སྙེ་མ་འབྲུ་