[A:230]མེད་ཐལ་བ་ནག་པོ་དེ། །བཙུན་མོ་སེར་སྣ་ཅན་དེའི་རྒྱགས་ཕྱེ་མཛོད། །ནགས་ལ་མེ་བརྒྱབ་སོལ་བའི་མདུང་ཤིང་དེ། །རྒྱལ་བུ་ལུས་རྩལ་ཅན་དེའི་མདུང་ཤིང་མཛོད། །ལུག་ལ་མཆེར་ཁྲག་མེད་པར་བསད་པ་དེ། །ལྷ་ཡི་དྲུང་དུ་སྡིག་བཤགས་སྨོན་ལམ་བྱ། །ལུས་ལ་ནད་མེད་མལ་དུ་ཉལ་བ་ལ། །སྔས་མགོར་སྨན་པ་བོས་ནས་ཅི་ཞིག་བྱ། ཁོ་བོ་མི་སྡོད་རང་གི་ཡུལ་དུ་འགྲོ། །ཟེར་ཏེ། རྟ་ལ་ལྕག་བརྒྱབ་སྟེ་སོང་ངོ༌། །དེར་རྒྱ་ཡུལ་དུ་སྙེ་ནག་མོ་ཤར་བ་དང༌། རྒྱ་རྣམས་ན་རེ། སྙེ་མའི་ནང་ན་འབྲུ་མི་འདུག བློན་པོ་ངན་པ་དེས། དར་ཟབ་ཐམས་ཅད་བསྲེག་ཏུ་བཅུག ལུག་ཐམས་ཅད་གསོད་དུ་བཅུག ནགས་ཐམས་ཅད་ལ་མེ་བརྒྱབ། ས་བོན་ཐམས་ཅད་བརྔོས་སུ་བཅུག་ནས་བཏབ་པས། ད་ནི་འབྲུ་མི་འདུག ལྷ་གཅིག་མཛངས་མ་དེ་བོད་ཀྱིས་ཁྱེར། ཇོ་བོ་ཤཱཀྱ་ནི་བོད་ཀྱིས་གདན་དྲངས། ངན་འདི་ཙམ་ཞིག་བྱས། ཀྱེ་མ་ཀྱེ་ཧུད་ད་ནི་ཇི་ལྟར་བྱ། ད་ཁོ་འདིར་འོང་བ་མི་སྲིད་དོ། ། བོད་དུ་བྲོས་པ་སྲིད་ཟེར་བའི་གཏམ་རྒྱལ་པོའི་སྙན་དུ་ཐོས་སོ། །དེ་བདེན་པར་ངེས་སམ་སྙམ་ནས། རྒྱའི་རྟ་པ་རྩལ་ཆེ་བ་བརྒྱ་ཐམ་པ་འཛིན་དུ་བཏང་ངོ། །དེར་གྱད་བཞི་པོ་ཡང་བཟི་སངས་ཏེ་འདི་སྙམ་དུ་བསམ་མོ། །རྟ་ཞོན་རྒྱུ་མེད། མཚོན་ཆ་ཡང་མི་འདུག་ཡུལ་དུ་ལོག་ན་ངོ་ཚ་ལ། རྒྱལ་པོའི་ཆད་པ་ཡང་བྱུང་དོགས་ནས། བློན་པོའི་ཕྱིར་འབྲངས་སོ། །དེར་རྒྱ་ཆུ་ཁུག་པའི་རྩར་སླེབ་དུས། རྒྱ་ནག་གི་འདེད་མི་རྣམས་ཀྱིས་ཀྱང་ཉེ་བར་སླེབ་བོ། །དེར་བློན་པོས་གྱད་བཞི་པོ་བྲན་དུ་བསྐུལ་ནས། རྒྱ་ཆུ་ཁུག་པའི་འགྲམ་དུ་རྟའི་སྦངས་དང༌། རྟ་རྗེས་ཀྱི་བཀང༌། གནའ་བའི་རྭ་མེ་ལ་བསོས་ནས། གཞུ་བཅོས། གྱད་བཞི་པོ་གདའ་རྒྱག་བཅུག་པས། མདའ་སྒྲོ་མཚམས་བར་ཕུད་བཞག་གོ །དེ་རྣམས་འདེད་མིས་མཐོང་ནས་