[A:233]འབངས་ཐམས་ཅད་ལྟད་མོ་ལ་འཚོགས་ནས། གླུ་གར་རྩེད་མོ་བསམ་གྱིས་མི་ཁྱབ་པ་བྱས་སོ། །དེར་བྲག་ལྷ་བཀྲ་ཤིས་ཀྱི་གཞལ་ཡས་ཁང་རྩེ་ནས། བལ་མོ་བཟས་གཟིགས་པས། རྒྱ་མོ་བཟའ་དཔོན་གཡོག་རྣམས་རྒྱན་དུ་མས་བརྒྱན་པ། བྲག་ལྷའི་ནེའུ་ཐང་ལ་འདུག་པ་མཐོང༌། ཆགས་སྡང་གི་ཕྲག་དོག་བསམ་གྱིས་མི་ཁྱབ་པ་ཞིག་སྐྱེས་ནས་འདི་སྐད་ཟེར་རོ། །ཀྱེ་མ་རྒྱ་མོ་ཀོང་ཇོ་ཁྱོད། །དེ་ན་གཡོག་འཁོར་བཅས་ཏེ་འདུག །དཀའ་ལས་བྱས་ཏེ་སྙེ་བོས་བཀུག །ས་ཐག་རིང་ཀྱང་བོད་དུ་སླེབ། །རྒྱ་རྗེའི་སྲས་མོ་ཡིན་ལགས་ཀྱང༌། །ང་དང་ཁྱོད་གཉིས་ཁྱད་པར་ཆེ༑ ༑ང་ནི་ཐེམ་པ་སྔ་བརྒལ་ཡིན། །བལ་རྗེའི་སྲས་མོ་ང་ཡང་ཡིན། །རྗེ་ཡི་སྐུ་མཐོང་ང་སྔ་བས། །ཆེན་མ་ཆེ་རྒྱུ་བཙུན་རྒྱུ་ཡིན། །ཆེན་མ་མི་ཆེ་མི་བཙུན་ན། ། འཇིག་རྟེན་ཆོས་ལུགས་མི་བདེན་རྫུན། །ཆེན་མ་རྒྱལ་པོའི་བཙུན་མོ་ཡིན། །ཆུན་མ་བཙུན་མོའི་གཡོག་མོ་ཡིན། །འོན་ཀྱང་རྗེ་ལ་བསམ་ནས་འོངས། །ཆེན་ཆུན་གཉིས་པོ་འགྲན་ནོ་ཨང༌། །དཀོན་མཆོག་དབུ་འཕང་བསྟོད་པར་འགྲན། །ཆོས་དང་དཀོན་མཆོག་བཞུགས་པའི་གཞི། །གཙུག་ལག་ཁང་རྣམས་བཞེངས་པར་འགྲན། །ཡར་ལ་རྗེ་ཡི་ཞབས་ཏོག་འགྲན། །མར་ལ་ངན་ལོང་སྐྱོང་བ་དང༌། །དད་པས་དམ་ཆོས་བྱེད་པར་འགྲན། །ཐད་ཀར་སྐལ་ནོར་བསོག་པ་དང༌། །ཞིང་ལ་སོ་ནམ་བྱེད་པར་འགྲན། །ཡུལ་གྱི་ཕ་མིང་ཆེ་ཆུང་དང༌། །རང་ལ་སྐལ་བརྫངས་ཅི་ཡོད་འགྲན། །དེ་རྣམས་འགྲན་པར་མ་ནུས་ན། ཁྱོད་ཀྱང་རྗེ་ལ་མ་རེག་ཞིག ། བཙུན་མོའི་རང་མཐོང་མ་ཆེ་ཞིག །ཆེན་མ་ཆེ་རྒྱུའི་ལྷ་ཁང་ནི། །བྲེ་ཚད་ཙམ་ཞིག་མ་བརྩིགས་པར། །ཆུན་མ་ཆུང་རྒྱུའི་ལྷ་ཁང་ནི། །ཕུལ་ཚད་ཙམ་ཡང་མ་བརྩིགས་ཤིག །ཟེར་བ་དང༌། རྒྱ་མོ་བཟའི་བསམ་པ་ལ། ལར་སྐྱོན་ཆེ། རང་གི་ཕ་མིང་