[A:232]ཆེན་པ་བཏང་སྟེ། འདི་ལྟར་ངེད་བློན་པོ་རྣམས་ཀྱིས། ཇོ་བོ་ཤཱཀྱ་དང༌། ལྷ་གཅིག་ཀོང་ཇོ་ལ་སོགས་པ་གདན་དྲངས་ནས་སླེབ་གིན་ཡོད་པས། བསུ་བ་དགའ་སྟོན་རྒྱ་ཆེན་པོ་ཞུ་ཞུས་སོ། །དེར་རྒྱལ་པོའི་ཞལ་ནས། འཕགས་པ་སྒྲོལ་མའི་སྤྲུལ་པ་ལྷ་གཅིག་དེ་ཡིན་པར་འདུག་པས་འཕྲུལ་ཆེ་བས། ཕྱོགས་གང་ནས་འོང་ངོ་མི་ཤེས་པས། བསུ་བ་ལེགས་པོ་གྱིས་ཤིག་གསུངས་སོ། །དེར་ཕྱོགས་བཞི་ཁ་རུ་མཐོང་སྣང་གི་སྤྲུལ་པར་བྱུང་སྟེ། ཤར་ཕྱོགས་པ་རྣམས་ན་རེ། ལྷ་གཅིག་ནི་ཤར་ཕྱོགས་ནས་བྱོན། དེའི་རྒྱུ་རྐྱེན། རབ་ཀྱི་མིང་ཀྱང་རྒྱ་མོ་རབ་བྱ་བ་ཡོད་ཟེར། ལྷོ་ཕྱོགས་པ་རྣམས་ན་རེ། ལྷ་གཅིག་ནི་ལྷོ་ཕྱོགས་ནས་བྱོན་ཏེ། གྲིབ་ཀྱི་ཕུའི་འཁྱག་རོམ་ལ། དུང་དཀར་གཡས་སུ་འཁྱིལ་བ་འདྲ་ཟེར་བ་དེ་དུས་བྱུང་ཟེར། ནུབ་ཕྱོགས་པ་རྣམས་ན་རེ། ལྷ་གཅིག་ནི་ནུབ་ཕྱོགས་ནས་བྱོན་ཏེ། སྦལ་པ་ཚལ་གྱི་བྲག་ལ་ཕག་པའི་སྣ་འདྲ་བས། མགོན་པོ་ཞིག་བཞེངས་ཟེར་བ་དེ་དུས་ཡིན་ཟེར། བྱང་ཕྱོགས་པ་རྣམས་ན་རེ། ལྷ་གཅིག་ནི་བྱང་ཕྱོགས་ནས་བྱོན་ཏེ། ལྷ་གཅིག་དང་ཇོ་བོ་ལ་བསུ་པ་བྱས་པས་གྲོང་གི་མིང་ཀྱང་ལྷ་བསུ་བ་བྱ་བར་ཡོད་ཟེར་དོན་དམ་པར་བྱང་ཕྱོགས་སྒོ་ལ་ནས་བྱོན་ནས། ར་མོ་ཆེའི་ཐང་ལ་ཕེབས་སོ། །དེར་ར་མོ་ཆེར་ཤིང་རྟ་བྱེ་མ་ལ་བྱིང་ནས། གྱད་ལྷ་དགའ་དང་ཀླུ་དགས་མ་དྲོངས་པར་ལུས་སོ༑ ༑དེར་ཇོ་བོའི་ཕྱོགས་བཞིར་ཀ་བ་བཞི་བཙུགས། དར་དཀར་གྱི་ཡོལ་བས་བྲེས་ནས་མཆོད་པ་བྱས་སོ། །དེའི་སང་ཉིན་ལྷ་གཅིག་ཀོང་ཇོ་དར་སྣ་ཚོགས་ཀྱི་གོས་གོན། གསེར་གཡུའི་རྒྱན་དུ་མས་བརྒྱན་ནས། མཛེས་མའི་བུ་མོ་ཉི་ཤུ་རྩ་ལྔ་ཡང་དར་ཟབ་དང༌། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན། པི་ཝང་རོལ་མོ་དང་བཅས་ཏེ། བྲག་ལྷའི་ནེའུ་ཐང་ལ་གཟིགས་མོ་ལ་ཕེབས་སོ། །དེར་བློན་པོ་བོད་