[A:234]དཔལ་འབྱོར་ལོངས་སྤྱོད་རྣམས་རྒྱབ་ཏུ་བསྐྱུར། ཡུལ་ཐག་རིང་ནས་འོངས། སླེབ་མ་ཐག་ཡིན་པ། སྡོད་པའི་གནས་མ་རྙེད། བསྟེན་པའི་ས་མ་རྙེད། རྒྱལ་པོའི་ཞལ་མ་མཐོང༌། བཙུན་མོའི་མིང་མ་ཐོབ། ཕྱི་ནང་གི་བློན་པོ་རྣམས་དང་མ་འདྲིས་པའི་གང་འདིར། ཕྲག་དོག་གི་འགྲན་ཚིག་འདི་བཞིན་བྱེད་པ་འདྲ་མོ་མིན། ངེད་རང་གཉིས་ཀ་ས་ཐག་རིང་ནས། རྒྱལ་པོའི་བཙུན་མོ་ལ་འདིར་ལྷན་དུ་འཛོམ། གཅིག་སྙིང་གཅིག་ལ་གཏད་སྐྱིད་སྡུག་བསྲེས་ནས། བློ་སེམས་གཅིག་ཏུ་དྲིལ་ཏེ་རྗེའི་ཞབས་ཏོག འབངས་ཀྱི་སྐྱོང་བྲན། ཆེན་ཆུན་གྱི་འགྲོགས་ལུགས། ཕྱི་ནང་གི་བྱ་བ་ཀུན་ལ་ཐོབ་རིམ་བཞིན་བྱས་ན། ཚེ་འདིའི་སྤུན་དང་འདྲ་སྟེ། དེ་བཞིན་མེད་པར་སླེབ་མ་ཁད། ཕྲག་དོག་གི་འགྲན་ཚིག་འདི་བཞིན་ཡིན་ན། ངེད་རང་གཉིས་ཕ་མིང༌། སྐལ་བརྫངས་རང་སྒོ། འཇིག་རྟེན་གྱི་བྱ་བ། གང་དང་སྤྱི་རྣམས་ཅིའི་ཕྱིར་མི་མཉམ་བསམས་ཏེ། ལན་སྨྲས་པ། ཨེ་མ་ངོ་མཚར་ཆེ་སྟེ་དགོད་རེ་བྲོ། ཁོ་མོས་སྡོད་པའི་གནས་ཀྱང་མ་རྙེད་ཅིང༌། །རྐང་པ་གཉིས་ཀྱིས་ཐེམ་པ་མ་བརྒལ་བར། །རྗེ་ཡི་ཞལ་ཡང་མིག་གིས་མ་མཐོང་བར། །བཙུན་མོ་ཁྱེད་ཀྱི་འགྲན་ཚིག་སྔས་པ་ཡིན། །འདབ་ཆགས་མཁའ་ལ་ལྡིང་བའི་རྩེ་སྒྲོ་དང༌། །རླན་དྲོད་ས་ལ་སྐྱེས་པའི་སྨྱུག་མ་གཉིས། །རང་ཆ་དགོས་པའི་གོ་གནས་མཉམ་ལགས་ཀྱང༌། ། ལས་ཀྱི་དབང་གིས་མདའ་མཁན་རྩ་རུ་འཛོམ། །སྟེང་འོག་བྱུང་བ་མིང་གི་ཁྱད་པར་ཡིན། །ཕུ་གསུམ་སྤང་ལ་སྐྱེས་པའི་མེ་ཏོག་དང༌། །མདའ་གསུམ་ལྡུམ་རར་སྐྱེས་པའི་ཧ་ལོ་གཉིས། །མཚར་སྡུག་བལྟ་བའི་ཆ་ནས་མཉམ་ལགས་ཀྱང༌། །རྟེན་འབྲེལ་དབང་གིས་ལྷ་ཡི་དྲུང་དུ་འཛོམ། །སྔ་རྟིང་བྱུང་ཡང་མིང་གི་ཁྱད་པར་ཡིན། ། བལ་ཡུལ་མཐིལ་ནས་བྱུང་བའི་ཁྲི་བཙུན་དང༌། །བུ་མོ་རྒྱ་ནས་ལོང་བའི་ཀོང་ཇོ་