[A:336]ཡུལ་ཞོག་ན་རྨུ་གསལ་གཤེན་འབར་བྱ་བའི་བོན་པོའི་བུ། རྨུ་ཟ་འཕན་བྱ་བའི་བྱིས་པ་ཞིག་གིས། སྣང་གསལ་ལྷ་ཁང་བྱ་བའི་ནང་དུ་ཕྱིན་པས། རབ་ཏུ་བྱུང་བ་ཆོས་ཉན་བཤད་བྱེད་པ་འདྲ་བའི་གཟུགས་གྱང་རིས་ལ་འདུག་པས་ཅི་ཡིན་དྲིས་པས། དེ་ན་འདུག་པའི་རྒན་མོ་ཞིག་ན་རེ། རབ་ཏུ་བྱུང་བ་བྱ་བའི་གཟུགས་ཡིན་བྱས་པས། བྱིས་པ་དེ་སྔོན་གྱི་ལས་འཕྲོའི་དབང་གིས་དད་པ་སྐྱེས་ནས་མཆི་མ་ཕྱུང་སྟེ། རབ་ཏུ་བྱུང་བ་ད་ལྟ་ཨེ་ཡོད་དྲིས་པས། རྒན་མོ་ན་རེ། ང་བུ་མོའི་དུས་ན་ཡིན་ཏེ། རྒྱལ་པོ་གླང་དར་མས་ཆོས་སྣུབས་པའི་དུས། རབ་ཏུ་བྱུང་བ་རྣམས་ཕབ་པས། རྟགས་དང་ཕྲལ། ལ་ལ་བསད། ལ་ལ་ཤི་ད་ལྟ་དབུས་གཙང་ན་རབ་ཏུ་བྱུང་བ་མེད་དོ། །ཆུ་བོ་རི་དང་ཡེར་པ་ལ་སོགས་ནས་ཁམས་སུ་བྲོས་པའི་རབ་བྱུང་མང་པོ་ད་ལྟ་ཁམས་ན་ཡོད་ཐག་ཆོད་འདུག་ཟེར་བས། རབ་ཏུ་དགའ་སྟེ། ལུས་དང་སྲོག་ལ་མ་བལྟས་པར་བྱིས་པ་དེས་ཁམས་སུ་ཕྱིན་པས། ལྷ་ལུང་དཔལ་གྱི་རྡོ་རྗེ་དང་མཇལ་ནས། དད་པ་སྐྱེས་ནས་རབ་ཏུ་བྱུང་བར་ཞུས་པས། ལྷ་ལུང་དཔལ་གྱི་རྡོ་རྗེའི་ཞལ་ནས། བདག་གིས་རྒྱལ་པོ་སྡིག་ཅན་བསད་པས་ང་ལ་སྡོམ་པ་མེད། ངས་གྲོགས་བྱ་ཡིས་གསུངས་ནས། མཁས་བཙུན་དེ་རྣམས་དང་མཇལ་རབ་ཏུ་བྱུང་བས། མིང་ཡང་བླ་ཆེན་དགོངས་པ་རབ་གསལ་དུ་གྲགས་སོ། །དེ་ལྟར་ཁམས་ན་སངས་རྒྱས་ཀྱི་བསྟན་པ་དར་ཞིང༌། བོད་ན་ཆོས་མེད་པར་མུན་པའི་སྨག་རུམ་དུ་གྱུར་པ་ན། རྒྱལ་པོ་སྡིག་ཅན་གྱིས་ཆོས་བསྣུབས་ནས་ལོ་བརྒྱད་ཅུ་ལོན་པ་ན་བསམ་ཡས་ཀྱི་མངའ་བདག་ཚ་ན་ཡེ་ཤེས་རྒྱལ་མཚན་དེས་བདག་རྐྱེན་མཛད་ནས་ཁམས་སུ་སྡོམ་པ་ལེན་པའི་ཐོག་མར། དབུས་གཙང་གི་མི་བདུན་དུ་གྲགས་པ་ནི། ཀླུ་མེས་ཤེས་རབ་ཚུལ་ཁྲིམས། འབྲི་ཡེ་ཤེས་ཡོན་ཏན། ཚོང་གེ་