[A:170]ནས། རྒྱལ་པོའི་བཙུན་མོ་ལ་རྟ་རྫི་བཅོལ་ལོ། །དེར་ཡུམ་བཙུན་མོ་དེས་རྟ་མཚོར་ཕྱིན་ནས། གཉིད་ལོག་པའི་རྨི་ལམ་ན། ཡར་ལྷ་ཤམ་པོའི་སྤྲུལ་པ་མི་དཀར་པོ་ཞིག་དང་འབྲེལ་བ་རྨིས། གཉིད་སད་ཙ་ན། སྔས་མགོ་ནས་གཡག་དཀར་པོ་ཞིག་ལོང་ནས་སོང་བ་མཐོང༌། དེ་ནས་ཟླ་བ་བརྒྱད་སོང་ཙ་ན། ཡུམ་བཙུན་མོ་དེ་ལ་ཁྲག་གོང་པོ་ལག་མགོ་ཙམ་འགུལ་ཤེས་པ་ཞིག་སྐྱེས་བྱུང་བ་བསྐྱུར་བར་ནི་ཤ་ནས་ཆད་སྙིང་རྗེ་བར་བྱུང༌། གསོ་བ་ལ་ནི་ཁ་མིག་གང་ཡང་མི་འདུག་ནས། འབྲོང་རུ་དྲོན་མོ་ཞིག་ཏུ་བཅུག གོས་ཐུང་གི་ངར་པས་དྲིལ་བཞག་པས། ཞག་འགའ་སོང་དུས་བལྟས་པས། ཁྱེའུ་ཞིག་བྱུང་འདུག དེའི་མིང་ཡང་འཇང་གི་བུ་རུ་ལ་སྐྱེས་ཞེས་གྲགས་སོ། །དེས་ལོ་བཅུ་ལོན་དུས་ངའི་ཕ་དང༌། ཕུ་བོ་རྣམས་གར་སོང་ཞེས། ཨ་མ་ལ་དྲིས་པས། ཨ་མས་སྔར་གྱི་ལོ་རྒྱུས་རྣམས་ཞིབ་པར་བཤད་པ་དང༌། རུ་ལ་སྐྱེས་ཀྱི་ཐབས་སྣ་ཚོགས་ཀྱིས་ཉང་ཆུ་སྐྱ་མོ་ནས་ཡབ་ཀྱི་པུར་བཙལ་ཏེ། ཕྱིང་ཡུལ་དར་ཐང་དུ་ཡབ་ཀྱི་བང་སོ་བརྩིག བློན་པོ་ལོང་ངམ་བསད། ཕུ་བོ་གསུམ་གདན་འདྲེན་ཕྱིན་པས། ཤ་ཁྲི་དང༌། ཉ་ཁྲི་གཉིས་གདན་མ་དྲོངས་ཏེ༑ ཀོང་པོ་དང༌། ཉང་པོའི་རྗེ་མཛད་ནས་ད་ལྟ་ཡང་གདུང་བརྒྱུད་ཡོད་དོ། །སྤོ་བོའི་ཡུལ་ནས། སྲས་བྱ་ཁྲི་གདན་དྲངས་ཏེ། ཡར་ལུངས་སུ་བཞུགས། སྐུ་མཁར་བྱིང་ང་སྟག་རྩེ་བརྩིགས། ཡུམ་གྱི་སྲས་བྱ་ཁྲི་ལ་འཇུས་ནས། ལྷ་ལ་དམོད་བོར་བས་ནམ་མཁའ་ནས་སྒྲ་བྱུང་སྟེ། ཁྱོད་ཀྱི་བུ་དེ་ཀུན་ལས་རྒྱལ་བར་འགྱུར་རོ། ། བུ་དེ་ཀུན་ལས་རྒྱལ་ཟེར་ཀྱང་སྤུ་དེ་གུང་རྒྱལ་དུ་གྲགས་སོ། །རྒྱལ་པོ་འདིས་རྒྱལ་ས་བཟུང་སྟེ། བློན་པོ་ནི་རུ་ལ་སྐྱེས་ཀྱིས་བྱས་སོ། །རྒྱལ་བློན་འདི་གཉིས་ཀྱི་དུས་སུ༑ གཡུང་དྲུང་གི་བོན་བྱུང་སྟེ། སྟོན་པ་གཤེན་རབ་མི་བོ་བྱ་བ་སྟག་གཟིག་འོལ་