[A:169] ནམ་མཁའ་ལ་འཇའ་ཡལ་བ་བཞིན་འགྲོ་ཡང་ཟེར། ཁྲི་བདུན་བང་སོ་ནམ་མཁའི་དབྱིངས་ལ་བཏབ། །ལྷ་ཡི་ལུས་ལ་རོ་མེད་འཇའ་ལྟར་ཡལ། །ཞེས་སོ། །སྲིབ་ཁྲི་བཙན་པོའི་སྲས། གྲི་གུམ་བཙན་པོ། དེ་ལ་སྲས་གསུམ་བྱུང་བ། ཤ་ཁྲི། ཉ་ཁྲི། བྱ་ཁྲི་གསུམ་ཡིན་ནོ། །རྒྱལ་པོ་གྲི་གུམ་བཙན་པོ་དེ། ཐུགས་གདོན་གྱིས་བསླུས་ཏེ༑ བློན་པོ་ལོང་ངམ་རྟ་རྫི་ཟེར་བ་ཞིག་ལ། ཁྱོད་ཀྱིས་ངའི་འཐབ་ཡ་བྱེད་དགོས་ཟེར་ནས། ལོང་ངམ་ན་རེ། རྗེ་ཅི་ལགས། ང་འབངས་ཤིག་གིས་རྗེའི་འཐབ་ཡ་མི་འོང་ཞུས་ཀྱང༌། དབང་མེད་དུ་བཅོལ་བས་འཐབ་པར་ཆས། སྐར་མ་ས་ག་དང་ས་རིའི་ཉིན་འཁྲུག་དུས་བྱས་སོ། །དེར་རྒྱལ་པོས། ཁྱི་མོ་ཉན་གྱི་རྣ་གསང་མ་བྱ་བའི་སྤྲུལ་པའི་ཁྱི་ཞིག་ཡོད་པ། ལོང་ངམ་གྱི་རྩར་ཉན་བཏང་བས། ལོང་ངམ་གྱིས་དེ་བཞིན་ངོ་ཤེས་ནས་གནངས་ཉིན་རྒྱལ་པོས་ངེད་རང་གསོད་དུ་འོང་སྟེ། དམག་གི་འཁོར་མ་ཁྲིད་པར། རྒྱལ་པོའི་དབུ་ལ་དར་ནག་གི་ཐོད་བཅིང༌། དཔྲལ་བར་མེ་ལོང་བཏགས། ཕྲག་པ་གཡས་ལ་ཝ་རོ་བཀལ། ཁྱི་རོ་གཡོན་ལ་བཀལ། རལ་གྲི་ཀླད་ལ་བསྐོར། གླང་དམར་ལ་ཐལ་སྒྲོ་བཀལ་བྱུང་ན། ངེད་རང་གིས་མི་ཐུབ་ཅེས་སྨྲས་སོ། ཁྱི་མོ་དེས་རྒྱལ་པོ་ལ་དེ་བཞིན་དུ་ཞུས་པས། དེ་ལྟར་བྱེད་གསུངས་ཏེ། གནངས་ཉིན་དེ་ལྟར་བྱས་ནས། ལོང་ངམ་གསོད་དུ་བྱོན། བསོ་སྒྲ་བཏབ་པས་གླང་དམར་འགྲོགས་ཏེ། ཐལ་སྒྲོ་རལ་བས་ཐལ་ཚུབ་ཀྱིས་མིག་ཁེང༌། ཝ་རོས་དགྲ་ལྷ་ཡལ། ཁྱི་རོས་ཕོ་ལྷ་ཡལ། རལ་གྲི་ཀླད་ལ་བསྐོར་བས་རྨུ་ཐག་ཆད། དེར་བློན་པོ་ལོང་ངམ་གྱིས་རྒྱལ་པོའི་དཔྲལ་བའི་མེ་ལོང་ལ་གཏད་ནས་མདའ་བརྒྱབ་པས་རྒྱལ་པོ་བཀྲོངས་སོ། །རྒྱལ་པོའི་སྲས་གསུམ་པོ་ནི། ཀོང་པོ་དང༌། ཉང་པོ། སྤོ་བོ་གསུམ་གྱི་ཡུལ་དུ་བྲོས་སོ། །དེར་བློན་པོ་ལོང་ངམ་གྱིས་རྒྱལ་སྲིད་ཕྲོགས་