[A:196]པོའི་ཡུལ་ནས་སྤྱན་དྲངས་པའི་ལེའུ་སྟེ་བཅུ་གཅིག་པའོ།། །།
བཅུ་གཉིས་པ། བལ་མོ་བཟའ་ཁྲི་བཙུན་གདན་དྲངས་པའི་སྐོར། དེ་ནས་ཡང་སྤྲུལ་པའི་རྒྱལ་པོ་དེའི་ཐུགས་དགོངས་ལ། བདག་གིས་ཁ་བ་ཅན་གྱི་ཡུལ་འདིར། ཐེག་པ་ཆེན་པོའི་ཆོས་དར་བར་བྱེད་པ་ལ། བཅོམ་ལྡན་འདས་ཀྱི་སྐུ་གཅིག་རྒྱ་གར་ན་བཞུགས། གཅིག་བལ་ཡུལ་ན་བཞུགས། གཅིག་རྒྱ་ནག་ན་བཞུགས། སྐུ་དེ་གསུམ་གང་ན་བཞུགས་པའི་ཡུལ་དེར། ཐེག་པ་ཆེན་པོའི་ཆོས་དར་ཡོད་པས། སྐུ་དེ་གསུམ་གང་རུང་ཞིག་ཇི་ལྟར་བྱས་ལ་གདན་འདྲེན་དགོངས་ཏེ༑ ཙནྡན་གྱི་སྐུ་རང་བྱོན་དེ་ལ་གསོལ་བ་བཏབ་པས། དེའི་ཐུགས་ཀ་ནས་འོད་ཟེར་གཉིས་འཕྲོས་ཏེ། གཅིག་ཤར་དུ་སོང༌། གཅིག་ནུབ་ཏུ་སོང༌། ནུབ་ཏུ་སོང་བ་དེ་ལ་བརྟེན་ནས་གཟིགས་པས། ནུབ་ཕྱོགས་བལ་པོའི་ཡུལ་ན་རྒྱལ་པོ་དེ་བ་ལྷ་ཞེས་པ་ལ། སྲས་མོ་ལྷ་གཅིག་ཁྲི་བཙུན་ཞེས་པ། སྐུ་མདོག་དཀར་ལ་དམར་བའི་མདངས་ཆགས་པ། ཞལ་ནས་ཧ་རི་ཙནྡན་གྱི་དྲི་བྲོ་བ། རིག་པའི་བསྟན་བཅོས་ཐམས་ཅད་ལ་མངའ་བརྙེས་པ་ཞིག་བཞུགས་པར་གཟིགས། དེ་སྤྱན་དྲངས་ན་བཅོམ་ལྡན་འདས་དགུང་ལོ་བརྒྱད་པའི་སྐུ་ཚད་དང༌། ཐེག་པ་ཆེན་པོའི་ཆོས་ཐམས་ཅད་བོད་དུ་གདན་འདྲོང་བར་གཟིགས་སོ། །ཤར་དུ་སོང་བ་དེ་ལ་བརྟེན་ནས་གཟིགས་པས། ཤར་ཕྱོགས་རྒྱ་ནག་གི་ཡུལ་ན། རྒྱ་རྗེ་ཐའི་ཛུང་རྒྱལ་པོ་བྱ་བ་ལ༑ སྲས་མོ་ལྷ་གཅིག་ཀོང་ཇོ་བྱ་བ། སྐུ་མདོག་སྔོ་ལ་དམར་བའི་མདངས་ཆགས་པ༑ ཞལ་ནས་ཨུཏྤལ་སྔོན་པོའི་དྲི་བྲོ་བ། རིག་པའི་བསྟན་བཅོས་ཐམས་ཅད་ལ་མངའ་བརྙེས་པ་ཞིག་བཞུགས་པར་གཟིགས་སོ། །དེ་སྤྱན་དྲངས་ན་བཅོམ་ལྡན་འདས་དགུང་ལོ་བཅུ་གཉིས་པའི་སྐུ་ཚད་དང༌། ཐེག་པ་ཆེན་པོའི་ཆོས་ཐམས་ཅད་