[A:211]ཡོད་དམ་མེད། དེ་ཡོད་ན་བུ་མོ་སྟེར། མེད་ན་མི་སྟེར། ད་ལན་སོང་ལ་དྲིས་ལ་ཤོག་ཟེར་བས། ཡང་མགར་གྱིས་ཤོག་དྲིལ་ཐ་མ་དེ་རྒྱལ་པོའི་ཕྱག་ཏུ་ཕུལ་ནས། འཕྲིན་རེ་ལ་རྒྱ་བོད་བར་ལ་འགྲོ་མི་འོང༌། རྒྱལ་པོ་ཁྱེད་ཀྱི་གསུང་དེའི་ལན་འདི་ལགས་པས་གཟིགས་པར་ཞུ་ཞེས་ཞུས་པས། དེར་རྒྱལ་པོས་ཁ་ཕྱེས་ནས་གཟིགས་པས་འདི་ལྟར་རོ། ཁྱེད་རྒྱ་ནག་གི་རྒྱལ་པོ་ནོར་ལོངས་སྤྱོད་ཡོད། ང་བོད་ཀྱི་རྒྱལ་པོ་ལ་ལོངས་སྤྱོད་དེ་བཞིན་མེད་དེ། རྒྱལ་པོ་ཁྱེད་ནོར་ལོངས་སྤྱོད་ཡོད་པ་ལ་དགྱེས་ནས་བུ་མོ་སྟེར་ན། ངས་སྐུ་ལུས་ཀྱི་བཀོད་པ་ལྔ་སྟོང་དུ་སྤྲུལ་ནས། གསེར་དངུལ་གྱི་ལོངས་སྤྱོད། འབྲུ་དང༌། དར་ཟབ་དང༌། གོས་དང༌། རྒྱན་དང༌། ཟས་ཀྱི་ལོངས་སྤྱོད་རྣམས་ལྷའི་ལོངས་སྤྱོད་ལ་འགྲན་ནུས་པ་ཙམ་བྱེད་ལ། གཞན་ཡང་ཕྱོགས་བཞི་ནས་ལས་སྒོ་རེ་ཕྱེས་ནས། ཁྱེད་མཐའི་ནོར་རྫས་ཐམས་ཅད་ཀྱང་དབང་མེད་དུ་ངའི་སྒོ་དྲུང་དུ་འདུ་ཞིང༌། ལོངས་སྤྱོད་དང་ལྡན་པར་བྱེད་དོ༑ ༑དེ་ངོ་མཚར་མི་ཆེའམ། དེ་ལྟར་བྱས་ཀྱང་ལྷ་གཅིག་མི་སྟེར་ན། ངས་སྤྲུལ་པའི་དམག་ཁྲི་ཕྲག་ལྔ་བཏང་ནས། ཁྱོད་གསོད། ལྷ་གཅིག་ཕྲོགས། ཡུལ་ཁམས་ཐམས་ཅད་བཅོམ་ལ་བཞག་གི་བྱ་བ་འདུག་པས། རྒྱལ་པོ་དེ་སྔར་བས་ཀྱང་སྐྲག་པར་གྱུར་ཏེ། རྒྱལ་པོ་དེའི་ཐུགས་ལ་ངའི་བུ་མོ་འདི་འདོད་མཁན་མང་ཡང༌། ཕུགས་སུ་བོད་ཀྱི་རྒྱལ་པོ་འདི་ལ་སྟེར་དགོས་པ་འདྲ་བསམ་ཞིང༌། ཐུགས་མ་བདེ་བར་ཕོ་བྲང་དུ་བྱོན་ནོ། །དེ་ནས་ཡབ་རྒྱལ་པོ་དང༌། ཡུམ་བཙུན་མོ་དང༌། སྲས་རྒྱལ་བུ་དང༌། ལྷ་གཅིག་རྣམས་གྲོས་བྱས་པས། ཡབ་ན་རེ། ཆོས་རྒྱ་གར་ནས་བྱུང་བ་ཡིན། ཁོང་དྲིན་ཆེ་བས་རྒྱ་གར་ཆོས་ཀྱི་རྒྱལ་པོ་ལ་སྟེར་གསུངས་སོ། །ཡུམ་སེར་སྣ་ཆེ་བས་སྟག་གཟིག་ནོར་གྱི་རྒྱལ་པོ་ལ་སྟེར་ཟེར་རོ། །རྒྱལ་བུ་ལུས་རྩལ་