[A:223]ge bya brgyad ma/ /ljon shing cho lo nor bu ris su bris/ /rgyal po ngo mtshar skye phyir khyod la brdzangs/ /rgya yi gab tse gtsug lag sum brgya po/ /legs nyes ston pa'i las kyi me long yang / /mdzes pa'i bu mo khyod la bdag gis brdzangs/ / bkod pa rig byed mdzes par byed pa yi/ /yid 'ong rgyan gyi khyad par 'phags pa dang / /bzo'i rig byed drug cu tham pa yang / /mdzes pa'i bu mo khyod la bdag gis brdzangs/ /bzhi brgya rtsa bzhi'i nad rnams 'joms pa'i sman/ / brtag thabs brgya dang dpyad lnga spyad drug dang / /sbyor sde bzhi la sogs pa bdag gis bskur/ /tshe gcig dros pa'i dar gos za 'og sogs/ kha dog sna tshogs ldan pa'i rgyan gos kyang / /stong phrag nyi shu bu mo khyod la brdzangs/ / rigs gzugs lta na sdug cing mdzes pa yin/ /sems mthun skyo grogs byed pa'i bu mo yang / /nyi shu rtsa lnga khyod kyi 'khor du brdzangs/ /e ma 'bral bar mi phod bu mo khyod/ /brtse ba'i snying gtam yin pas sems la zhog kha ba can gyi mi rnams 'dul don du/ khyod kyis bya ba spyod lam 'di bzhin gyis/ /lta ba yangs shing spyod lam zhib bar mdzod/ /phyi nang bya ba kun la mkhas par mdzod/ /ngag 'jam smra mkhas gzhi ma legs par mdzod/ /rje la gus shing 'khor la byams par mdzod/ khrel yod ngo tsha bag dang ldan par mdzod/ /ces pa la sogs pa'i 'jig rten mi chos la dgos pa'i bslab bya dpag tu med pa mdzad do/ /yab kyis phyag nas 'jus shing 'bral mi phod pa ltar yod na yang / bod du 'gro dgos par dgongs te/ lha gcig la rdzong bsam gyis mi khyab pa mdzad do/ /de nas lha gcig g.yog mo de dang 'grogs te/ blon po mgar gyi rtsar byung nas/