[A:126]theg pa thun mong ma yin pa'i chos kyi 'khor lo bskor/ de dang yangs pa can dang / 'od ma'i tshal la sogs par 'khor theg pa la yang dag par zhugs pa'i byang chub sems dpa' rnams la don dam rnam par nges pa'i chos kyi 'khor lo bskor ro/ /de nas byang chub snying por gshegs te/ sa ga nya ba'i tshes bco lnga'i srod la bdud btul/ gung la mnyam par bzhag tho rangs mngon par rdzogs par sangs rgyas te/ mdzad pa bcu gnyis mthar phyin par mdzad nas/ dgung lo brgyad cu lon pa'i tshe/ rtsa mchog gi drung du mya ngan las 'das pa'i tshul bstan to| |ston pa mya ngan las 'das pa'i rjes su 'phags pa dgra bcom pa rnams kyis bka' bsdu ba rim pa gsum du mdzad do/ /bcom ldan 'das 'khrungs pa dang dus mnyam du/ yul bzhi ru rgyal po bzhi 'khrungs pa ni/ mnyan yod du tshangs byin gyi bu gsal rgyal/ rgyal po'i khab tu padma chen po'i bu gzugs can snying po/ ko shambh-i na dmag brgya pa'i bu shar pa'o/ /'phags rgyal du mu khyud mtha' yas kyi bu gtum po rab snang ngo / /bcom ldan 'das ni jo bo rje'i lugs la| shing pho byi la lhums su zhugs/ shing mo glang la sku bltams/ chu mo phag la sangs rgyas/ shing pho spre'u la mya ngan las 'das par bzhed la/ chos rje sa skya pa'i lugs la/ me mo yos la lhums su zhugs/ sa pho 'brug la sku bltams/ chu pho stag la sangs rgyas/ me mo phag la mya ngan las 'das par bzhed pa yin/ sa skya pa'i lugs/ bcom ldan 'das 'brug lo la sku 'khrungs par brtsis pa'i steng du/ bla ma ti shrI kun blos/ chu pho khyi'i lo la dbus su bsnyen rdzogs mdzad pa yan la lo sum stong bzhi brgya lnga bcu rtsa lnga 'das/ rtsa drug pa'i steng na yod la/