[A:251]pos sprul pa mdzad pas/ rtsig pa la nyin zhag bzhi/ shing bzo la nyin zhag drug thog 'bub pa la nyin zhag gnyis/ dril bas nyin zhag bcu gnyis la/ ra sa'i 'og khang yongs su rdzogs par zin par byas so/ /de yang sgo bzhi dkyil 'khor ris su byas pas bla ma dga'/ ka ba phur pa ris su byas pas sngags pa dga'/ zur bzhi g.yung drung ris su byas pas bon po dga'/ re'u mig ris su byas pas bod 'bangs dga'/ gyis zer ba'i gzugs thams cad byas pas/ chos skyong klu dang gnod sbyin srin po la sogs pa rnams dga'o/ /de yang dga' bzhi 'phrul gyi lha khang gi sgo yang nub phyogs bal po'i yul du gtad do/ /de'i 'phro la khri btsun gyis bal po'i yul nas rig byed la mkhas pa'i bzo bo mang po bos nas steng khang bzhengs so/ /
lha sa'i steng khang dang / ra mo che gnyis la zla ba bcu gnyis re 'gor te lhan du tshar ro/ /
de dang dus mnyam du rgya mo bzas kyang rgya yul nas shing bzo ba dang / lha bzo ba mang po bos nas/ rgya stag ra mo che'i lha khang bzhengs te/ lha khang gi sgo shar du bstan no/ /de'i bar la rgyal pos sprul pa mdzad nas mtha' 'dul dang / yang 'dul dang / ru gnon gyi lha khang bzhengs pa ni/ srin mo'i dpung pa g.yas gnon pa'i phyir/ sbu ru ka tshal mi 'gyur ba'i lha khang bzhengs/ de'i yan lag tu gser shang gi rti'i lha khang bzhengs/ de'i sgrub pa rtse mo gdong gi brag phug tu byas so/ /dpung pa g.yon gnon pa'i phyir/ g.yo ru khra 'brug bkra shis byams snyoms kyi lha khang bzhengs/ de'i yan lag tu tsan thang gi lha khang btab/ de'i sgrub pa phug mo cher byas so/ /dpyi mgo g.yas gnon pa'i phyir/ g.yas ru gtsang 'brang byang chub dge gnas kyi lha khang bzhengs/ de'i