[A:323] shing bzo'i phud la gnam yas ka ba bzhi rin po ches brgyan pa dang / ri mo'i phud la rnying pa gso rgyu nyan pa/ be bum brgya rtsa brgyad lugs ma'i phud du ljang la sogs pa rnams phul lo/ /gzhan yang rgyal po'i mchod gnas/ nyang sha'i spyan dang / blon po 'ga' zhig gis/ lha sa'i shar du/ ka ru dang rme ru/ lho ru dga' ba dang / dga' ba'i 'od/ byang du bran khang dang / bran khang tha ma la sogs pa'i lha khang bzhengs so/ /de ltar rgyal po khri gtsug lde btsan ral pa can de/ mkhyen pa ni 'phrul gyi tshul chags/ mdzad pa ni lha'i lugs dang mthun/ mnga' thang dpal 'byor ni lha'i dbang po brgya byin dang mnyam/ dbang dang mthu stobs kyis ni bdud sdig can skrag par byed pa/ mtha' bzhi las rnam par rgyal te/ 'dzam bu gling gsum gnyis la dbang mdzad pa yin no/ /de ltar yang snga gong nas rgya bod kyi 'brel tshul/ btsan po dbon zhang rim bzhin byon pa rnams kyi lo rgyus mthun nas skyes 'bul res mdzad pa dang / 'khon nas dmag 'dren res mdzad pa'i rnam grangs mang du mdzad de/ de'ang rgya'i deb ther chen po zhu thu han chan bya ba na/ bcom ldan 'das mya ngan las 'das nas lo stong dang lnga brgya drug cu rtsa drug lon pa'i dus rgya nag gi rgyal po thang zhes bya ba byung ste/ bod kyi rgyal po gnam ri srong btsan dang dus mnyam/ de'i sras tha'i dzun rgyal po'i dus/ srong btsan sgam po dang dus mnyam ste/ bod kyi rgyal pos rgya rje'i sras mo slong ba'i pho nya btang bas rgya rjes bu mo ma byin par bod du log ste/ rgyal po la rdzun zhus nas/ rgya rje de nged rang la shin tu dga' nas bu mo ster bar yod pa la/ hor ser thu lu hun gyis rgya rje la phra ma zhus pas lan zhes zhus pas/ bod kyi