[A:322]yug btags/ dge 'dun bzhugs pa'i gral g.yas g.yon la bting / de'i steng du dge 'dun bzhugs par mos la dge 'dun dbu sde gnyis zhes grags so| |thugs dam du 'u shang rdo dpe med bkra shis dge 'phel gyi gtsug lag khang bzhengs par 'dod nas/ li'i yul nas rig byed la mkhas pa'i bzo bo bos/ bal po'i yul nas lha bzo dang / rdo bzo ba mang po bos nas lha khang dgu thog tu mdzad pa la/ 'og gi thog gsum sgo dpe dang bcas pa rdo las grub/ bar gyi thog gsum sgo dpe dang bcas pa so phag las grub/ steng gi thog gsum sgo dpe dang bcas pa shing las grub/ rgya phub dgu brtsegs yod pa/ rgya phub re re'i bya 'dab bar na/ rab tu byung ba chos nyan bshad byed pa bzhugs/ steng gi rgya phub gser 'brug g.yu 'brug dang bcas pa/ rlung gis bskyod dus gdugs ltar 'khor ba/ bar gyi rtsig pa'i steng na/ rin po che'i pha gu la/ mda' yab dang pu shu/ dra ba dang dra ba phyed pas mdzes pa/ gdugs dang / rgyal mtshan dang / rin po che'i phreng ba dang / dar gyi cod pan dang / dril bu g.yer kha'i sgra 'khrol ba| rgya phub rtse'i gser 'bru rgyab ri dang mtho dman mnyam pa/ bod yul kun na 'gran zla dang bral zhing mthong ba tsam gyis dang bar byed la/ rlung chen rgya phub kyi phyogs bzhir lcags thag btang ste phyogs bzhir rdo'i seng ge dang sbrel/ de la steng gi thog gsum na rje'i thugs dam bzhugs/ bar gyi thog gsum na mchod gnas dge 'dun bzhugs/ 'og gi thog gsum na rje blon 'khor dang bcas pa bzhugs so/ /de ltar 'u shang rdo dpe med bkra shis dge 'phel gyi gtsug lag khang bzhengs pa'i phud la/ lha sar sa phud/ tshangs pa dang brgya byin/