[A:337]shes rab seng ge lo ston rdo rje dbang phyug sum pa ye shes blo gros/ rgya blo gros shes rab/ gzhon ban chos mchog dang bdun gyis grum ye shes rgyal mtshan la mkhan po zhus/ co ro shes rab byang chub la slob dpon zhus nas bka' drin mnos so/ /de'i rting la phyin pa lnga ni/ mtha' bzhi rgyal 'phags/ rag shi tshul khrims 'byung gnas/ sba btsun blo gros dbang phyug skyes legs nyang bran chos skyabs/ grum shing shes rab smon lam mo/ /de ltar sngon la khams su sdom pa len du phyin pa'i mi bdun po des sdom pa blangs nas phyir 'ongs pa dang / rting la phyin pa'i mi lnga po dag lam la 'phrad de/ gar 'gro dris pas/ khams su sdom pa len du 'gro zer bas/ sngon ma rnams na re/ nged rnams kyi sdom pa gsum ldan du blangs yod pas nged kyis sdom pa phog pas chog thag ring la 'gro mi dgos zer ba la ma nyan par khams su phyin te/ sngar gyi mkhas btsun rnams dang mjal/ sdom pa blangs te phyir dbus gtsang du slebs nas bsam yas kyi btsad po tsha na ye shes rgyal mtshan grongs 'dug na'ang / de'i sras btsad po khri pas bdag rkyen mdzad de/ klu mes la sogs pa rnams kyis dbus gtsang thams cad du lha khang bsam gyis mi khyab pa brtsigs dge 'dun gyi sde btsugs/ sangs rgyas kyi bstan pa rin po che slar shing skam gyi phung po la me 'bar ba lta bur phyogs thams cad du dar zhing rgyas pa na bstan pa'i srog rtsa legs par bzung me ro bslangs nas bod mun pa'i gling du sgron me 'bar bar mdzad pa gong du bshad pa'i khams dbus kyi mkhas btsun rim par byon pa de rnams dang mnga' bdag ye shes rgyal mtshan yab sras rnams sku drin shin tu che'o/ /