[A:338]
sum cu pa/ de ltar bstan pa rin po che la bka' drin che ba'i bod rgyal po'i gdung brgyud gong du bshad pa ltar/ rje dpal 'khor btsan gyi chen ma'i sras/ skyid lde nyi ma mgon gyis mnga' ris kyi rgyal po mdzad/ spu rangs la'ang dbang bsgyur/ de la sras gsum che ba dpal gyi mgon gyis mang yul bzung /
'di nas jo bo ras chen gyi bar du brgyud/
bar pa bkra shis mgon gyis spu rangs bzung / chung pa lde btsun mgon gyis zhang zhung bzung / 'di gsum la stod na bzhugs pa'i mgon gsum zer/ lde btsan mgon la sras gnyis te/ 'khor re dang srong nge gnyis so/ /srong nges sku tshe'i stod la btsun mo khab tu bzhes pas sras gnyis 'khrungs pa'i na ga ra tsa dang / dhe ba ra tsa'o/ /sku tshe'i smad la rab tu byung nas/ lha bla ma ye shes 'od du mtshan gsol/ mthon mthing dpal gyi lha khang bzhengs/ lo tsA ba rin chen bzang po dang / rngog legs pa'i shes rab la sogs pa blo rno ba nyi shu rtsa gcig rgya gar du chos slob pa la btang / paNDi ta shraddha ka ra dang warma ta gnyis spyan drangs te/ mtshan nyid kyi theg pa dang / rgyud sde bzhi po bsgyur zhing gtan la phab/ 'dul ba stod lugs dar bar mdzad do/ /gcen po 'khor res kha char gyi lha khang bzhengs/ de'i sras lha lde pos paNDi ta su bha Shi da dang paNDi ta rme ru spyan drangs/ lha lde po la sras gsum 'khrungs pa'i che ba zhi ba 'od/ 'bring ba lha bla ma byang chub 'od/ chung ba 'od lde'o/ /'di gsum gyi dus su lha bla ma ye shes 'od kyis/ sangs rgyas kyi bstan pa la dgongs nas/ rgya gar du paNDi ta gdan 'dren byon pas lam du mu stegs pa'i dmag gis bzung / dge phyogs kyi yon tan skyed pa'i rtsa sgo thams cad me btsas bsregs te rmongs par byas so/ /