[A:339] de'i gtam lha bla ma byang chub 'od kyis gsan te/ nor dpag med bskur nas blu ru btang bas/ gser lus dang ljid mnyam pa dgos zer ba dang / yang gser gang yod bskur bas rgya ma la bteg dus dbu'i cha tsam zhig gser gyis ma long par khong na re/ da ni khyed rnams kyis bdag blus kyang yon tan med/ nga'i rtsa sgo me btsas bsregs nas dud 'gro lta bu yod pas bdag shi na'ang bla'i/ nga blu ba'i gser rnams khyer la rgya gar na rgyal po dge ba dpal gyi sras bi kra ma la shI la'i gtsug lag khang na/ rig pa'i gnas lnga la mkhas pa'i paNDi ta lnga brgya pa rnams kyi nang nas gtsug gi nor bur gyur pa/ jo bo rje dI paM kA ra zhes bya ba bzhugs yod par 'dug de la gser phul bod du gdan drangs la/ sangs rgyas kyi bstan pa dar rgyas su mdzod cig gsungs te grongs pa dang / pur yul du spyan drangs nas mchod rten du bzhugs so/ /
so gcig pa/ der khong gis lung bstan bzhin/ jo bo gdan 'dren pa la rgya brtson seng la sogs pa la gser bskur nas btang ngo / /bod du 'byon pa la thabs du ma'i sgo nas gsol ba btab pas/ jo bos kyang bod mnga' ris kyi gdul bya la dgongs/ rje btsun ma sgrol mas kyang lung bstan pa bzhin bod du byon nas/ slob ma nag tsho dang khu rngog 'brom gsum/ lo tsA ba rin chen bzang po| lo chung legs pa'i shes rab la sogs pa mkhas btsun du ma byon te/ bod gangs can gyi ljongs 'dir sangs rgyas kyi bstan pa nyi ma shar ba lta bur mdzad pas na/ lha bla ma byang chub 'od de bod la bka' drin che ba lags so/ /