[A:144]spyan ras gzigs kyis 'dul ba'i zhing khams su gyur pa'i rgyu mtshan de yin no// zhes gsungs te/ thugs ka nas 'od zer dkar po pun Da rI ka'i me tog lta bu zhig 'phros te/ 'jig rten gyi khams snang bar byas te/ nub phyogs bde ba can du song nas sangs rgyas snang ba mtha' yas kyi thugs kar thim mo/ /yang sangs rgyas snang ba mtha' yas kyi thugs ka nas 'od zer zhig 'phros te/ mtsho padma can du thim par gyur nas mtha' 'khob kha ba can 'dul ba'i sangs rgyas sprul sku gcig 'byon par lung bstan no/ /bde ba can gyi zhing khams de na rin po che gser gyi sa gzhi la/ mig mangs ris su bris pa las/ /'byung ba sa rdo bya ba'i ming yang med/ /ye shes gsal ba'i me 'bar bas/ /'byung ba me yi ming yang med/ /yan lag brgyad ldan chu 'bab pas/ /'byung ba chu yi ming yang med/ / byang chub shing gis mdzes pa la/ /shing rtsi nags kyi ming yang med/ /bsam gtan zas kyis 'tsho ba la/ /bkres shing skom pa'i ming yang med/ /tshul khrims rnam dag gos gyon pas/ /snal ma gos kyi ming yang med/ /rang gi 'od dang ldan pa las/ /nyi zla bya ba'i ming yang med/ /thams cad bzod pa'i stobs ldan pas// 'thab cing rtsod pa'i ming yang med/ /bde ba chen po ma lags pa/ /sdug bsngal bya ba'i ming yang med/ /mya ngan 'das pa ma lags pa/ /'khor ba bya ba'i ming yang med/ /sangs rgyas sku gsum ma lags pa/ /sems can bya ba'i ming yang med/ /rdo rje tshe la mnga' brnyes pas/ /rgas shing 'chi ba'i ming yang med/ / 'byung bzhi'i lus 'di ma blangs pas/ /na tsha bya ba'i ming yang med/ /padma'i sdong por rdzus skyes pas/ /skye ba rnam bzhi'i ming yang med/ /bde ba can gyi zhing