[A:145]khams de na/ chos rgyal bzang po mchog ces bya ba bzhugs pa des/ sangs rgyas la me tog 'bul ba la/ mtsho padma can gyi 'gram du/ 'khor rnams me tog thu ba la btang dus mtsho'i nang na padma'i sdong po chen po gcig la yal ga ni gnya' shing tsam/ lo ma ni phub tsam/ de'i 'dab ma stong ldan gyi dkyil na/ ze'u 'bru rdza ma tsam zhig la 'od zer sna tshogs 'phro ba zhig mthong ngo / /mthong nas kyang rgyal po la zhus pas/ ngo mtshar skyes nas gzings chen po zhig byas/ mchod pa sna tshogs thogs te/ rgyal po 'khor bcas kyis padma'i sdong po de'i rtsar byon nas mchod pa phul/ smon lam btab ste ze 'bru de tshal pa bzhir gshags pa'i nang nas mtha' 'khob kha ba can 'dul ba'i gnyen po rdzus skyes kyi sprul pa'i sku/ zhabs gnyis rdo rje skyil krung du bzhugs pa/ zhal gcig phyag bzhi pa/ dang po gnyis thugs kar thal mo sbyar ba/ g.yas kyi 'og ma na shel dkar gyi phreng ba 'dzin pa/ g.yon gyi 'og ma na padma dkar po bzung nas snyan gyi thad du kha phye ba/ mtshan dang dpe byad kyis brgyan pa/ rin po che'i rgyan du mas spras pa/ dar sna tshogs kyi na bza' gsol ba/ sku mdog gangs ri'i phung po la nyi ma shar ba lta bur yod pa/ ri dwags e na ya'i lpags pa phrag pa g.yon pa la bkal nas nu ma bkab pa/ ral pa'i zur phud lnga dang ldan zhing rin po ches dbu brgyan pa/ zhal 'dzum zhing yid du 'ong ba/ 'od dang 'od zer phyogs bcur 'phro ba zhig byon pa dang / rgyal po 'khor dang bcas pa dga' zhing mgu la yi rangs par gyur te/ rol mo du ma dang bcas nas rgyal po'i pho brang du gdan drangs so/ /de nas rgyal pos sangs rgyas snang ba mtha' yas la 'di skad ces gsol to/ /padma