[A:196]po'i yul nas spyan drangs pa'i le'u ste bcu gcig pa'o// //
bcu gnyis pa/ bal mo bza' khri btsun gdan drangs pa'i skor/ de nas yang sprul pa'i rgyal po de'i thugs dgongs la/ bdag gis kha ba can gyi yul 'dir/ theg pa chen po'i chos dar bar byed pa la/ bcom ldan 'das kyi sku gcig rgya gar na bzhugs/ gcig bal yul na bzhugs/ gcig rgya nag na bzhugs/ sku de gsum gang na bzhugs pa'i yul der/ theg pa chen po'i chos dar yod pas/ sku de gsum gang rung zhig ji ltar byas la gdan 'dren dgongs te| tsandan gyi sku rang byon de la gsol ba btab pas/ de'i thugs ka nas 'od zer gnyis 'phros te/ gcig shar du song / gcig nub tu song / nub tu song ba de la brten nas gzigs pas/ nub phyogs bal po'i yul na rgyal po de ba lha zhes pa la/ sras mo lha gcig khri btsun zhes pa/ sku mdog dkar la dmar ba'i mdangs chags pa/ zhal nas ha ri tsandan gyi dri bro ba/ rig pa'i bstan bcos thams cad la mnga' brnyes pa zhig bzhugs par gzigs/ de spyan drangs na bcom ldan 'das dgung lo brgyad pa'i sku tshad dang / theg pa chen po'i chos thams cad bod du gdan 'drong bar gzigs so/ /shar du song ba de la brten nas gzigs pas/ shar phyogs rgya nag gi yul na/ rgya rje tha'i dzung rgyal po bya ba la| sras mo lha gcig kong jo bya ba/ sku mdog sngo la dmar ba'i mdangs chags pa| zhal nas utpal sngon po'i dri bro ba/ rig pa'i bstan bcos thams cad la mnga' brnyes pa zhig bzhugs par gzigs so/ /de spyan drangs na bcom ldan 'das dgung lo bcu gnyis pa'i sku tshad dang / theg pa chen po'i chos thams cad