[A:207]lhan du rgyugs pa lta bu'i sgra 'ong ba'o/ /lho phyogs su so phag gi mkhar la dpe blangs nas/ brag lha bkra shis kyi gzhal yas khang bya ba/ khri btsun rang gi sku mkhar dgu thog yod pa zhig brtsigs te/ mtha' gru che zhing mtho la legs pa/ bkod pas mdzes pa zhig brtsigs so/ /rgyal po'i sku mkhar dang / btsun mo'i sku mkhar gnyis kyi bar lcags zam gyis sbrel te/ de'i 'og na/ dar dang / rnga yab dang / dril bu g.yer kha'i sgra 'khrol ba/ rgyal po yab yum phar gshegs tshur gshegs mdzad pa'o/ /de lta bu'i pho brang 'gran zla dang bral ba ngo mtshar che zhing mdzes pa zhig legs par tshar nas/ rje blon kun gyis dga' ston rgya chen po mdzad do/ /bal mo bza' khri btsun gdan drangs pa'i le'u ste bcu gnyis pa'o// //
bcu gsum pa/ rgya mo bza' kong jo gdan drangs pa'i skor/ de nas yang blon po mgar gyis/ rgyal po'i drung du phyin te/ rgya nag gi lha gcig de'ang gdan 'dren pa'i bka' gnang bar zhu zhes zhus so/ /yang rgyal pos gser gyi dong rtse bdun bskur nas/ 'di la zhu rten gyis shig gsungs so/ /rin po che'i khrab la padma rA ga'i phra brgyab pa zhig bskur nas/ 'di lha gcig de'i rin du phul cig gsungs so/ /gser phye bre gang bskur nas 'di gar dgos su thong zhig gsungs so/ /rgyal po des bka' lung mi 'dra ba lan gsum btud mar gsung du 'ong gis/ de'i dus su 'di gsum re re bzhin gtod cig gsungs nas/ bka' shog gi shog dril gsum bskur ro/ /'phral gyi yo byad gos dang rgyan la sogs pa/ rnga mo dang / drel la sogs pa la bkal ba'i khal mang po brdzangs