[A:208]so| |nyin mtshan dang lam 'phrang gang du'ang rje btsun ma sgrol ma la gsol ba 'debs gin song zhig gsungs so/ /de nas mgar gyis rgyal pos bskur ba thams cad khyer khal rnams ded/ blon po rta pa brgya dang lhan du me pho spre'u'i lo zla ba bzhi pa'i tshes brgyad skar ma rgyal dang 'dzom par rgya nag tu chas so/ /der rgya nag zim shing / bkra shis khri sgo/ rgya rje tha'i dzung bzhugs pa'i pho brang gi sgo drung du slebs so/ /de na ni mi khyim 'bum tsho tsam yod pa/ logs re la nyin lam re yod pa sgo mo che bzhi yod pa/ mthong ba tsam gyis dngangs zhing 'jigs pa zhig 'dug go /der rgya gar chos kyi rgyal po'i blon po rta pa brgya tham pa/ rgya mo kong jo 'dod pa la slebs so/ /ge sar dmag gi rgyal po'i blon po rta pa brgya kong jo 'dod pa la slebs so/ /stag gzig nor gyi rgyal po'i blon po rta pa brgya yang kong jo 'dod pa la slebs so/ /bha ta hor gyi rgyal po'i blon po rta pa brgya yang kong jo 'dod pa la slebs so/ /mi rigs mi 'dra ba'i gnye bo rta pa lnga brgya rgya rje'i drung du dus gcig la slebs so/ /der rgya gar ba rnams shar sgo na yod/ ge sar ba rnams lho sgo na yod/ /stag gzig pa rnams nub sgo na yod/ hor rnams byang sgo na yod/ bod blon rnams byang shar mtshams su bsdad do/ /der blon po gzhan ma rnams kyis zhu rten phul te mjal phrad byas so/ /bod blon rnams kyis mjal bar zhus pas/ sgug tu bcug zhag bdun song ba dang / rgyal po 'khor dang bcas pa pho brang gi phyi rol du byon pa la/ mgar gyis gser gyi dong rtse bdun po de/ zhu rten du phul/ rin po che baiDUrya'i khrab la padma rA ga'i phra brgyab pa rgyal po'i drung du bzhag ste/ mgar na re/ rgyal po chen po rin po che