[A:207]ལྷན་དུ་རྒྱུགས་པ་ལྟ་བུའི་སྒྲ་འོང་བའོ། །ལྷོ་ཕྱོགས་སུ་སོ་ཕག་གི་མཁར་ལ་དཔེ་བླངས་ནས། བྲག་ལྷ་བཀྲ་ཤིས་ཀྱི་གཞལ་ཡས་ཁང་བྱ་བ། ཁྲི་བཙུན་རང་གི་སྐུ་མཁར་དགུ་ཐོག་ཡོད་པ་ཞིག་བརྩིགས་ཏེ། མཐའ་གྲུ་ཆེ་ཞིང་མཐོ་ལ་ལེགས་པ། བཀོད་པས་མཛེས་པ་ཞིག་བརྩིགས་སོ། །རྒྱལ་པོའི་སྐུ་མཁར་དང༌། བཙུན་མོའི་སྐུ་མཁར་གཉིས་ཀྱི་བར་ལྕགས་ཟམ་གྱིས་སྦྲེལ་ཏེ། དེའི་འོག་ན། དར་དང༌། རྔ་ཡབ་དང༌། དྲིལ་བུ་གཡེར་ཁའི་སྒྲ་འཁྲོལ་བ། རྒྱལ་པོ་ཡབ་ཡུམ་ཕར་གཤེགས་ཚུར་གཤེགས་མཛད་པའོ། །དེ་ལྟ་བུའི་ཕོ་བྲང་འགྲན་ཟླ་དང་བྲལ་བ་ངོ་མཚར་ཆེ་ཞིང་མཛེས་པ་ཞིག་ལེགས་པར་ཚར་ནས། རྗེ་བློན་ཀུན་གྱིས་དགའ་སྟོན་རྒྱ་ཆེན་པོ་མཛད་དོ། །བལ་མོ་བཟའ་ཁྲི་བཙུན་གདན་དྲངས་པའི་ལེའུ་སྟེ་བཅུ་གཉིས་པའོ།། །།
བཅུ་གསུམ་པ། རྒྱ་མོ་བཟའ་ཀོང་ཇོ་གདན་དྲངས་པའི་སྐོར། དེ་ནས་ཡང་བློན་པོ་མགར་གྱིས། རྒྱལ་པོའི་དྲུང་དུ་ཕྱིན་ཏེ། རྒྱ་ནག་གི་ལྷ་གཅིག་དེའང་གདན་འདྲེན་པའི་བཀའ་གནང་བར་ཞུ་ཞེས་ཞུས་སོ། །ཡང་རྒྱལ་པོས་གསེར་གྱི་དོང་རྩེ་བདུན་བསྐུར་ནས། འདི་ལ་ཞུ་རྟེན་གྱིས་ཤིག་གསུངས་སོ། །རིན་པོ་ཆེའི་ཁྲབ་ལ་པདྨ་རཱ་གའི་ཕྲ་བརྒྱབ་པ་ཞིག་བསྐུར་ནས། འདི་ལྷ་གཅིག་དེའི་རིན་དུ་ཕུལ་ཅིག་གསུངས་སོ། །གསེར་ཕྱེ་བྲེ་གང་བསྐུར་ནས་འདི་གར་དགོས་སུ་ཐོང་ཞིག་གསུངས་སོ། །རྒྱལ་པོ་དེས་བཀའ་ལུང་མི་འདྲ་བ་ལན་གསུམ་བཏུད་མར་གསུང་དུ་འོང་གིས། དེའི་དུས་སུ་འདི་གསུམ་རེ་རེ་བཞིན་གཏོད་ཅིག་གསུངས་ནས། བཀའ་ཤོག་གི་ཤོག་དྲིལ་གསུམ་བསྐུར་རོ། །འཕྲལ་གྱི་ཡོ་བྱད་གོས་དང་རྒྱན་ལ་སོགས་པ། རྔ་མོ་དང༌། དྲེལ་ལ་སོགས་པ་ལ་བཀལ་བའི་ཁལ་མང་པོ་བརྫངས་