[A:211]yod dam med/ de yod na bu mo ster/ med na mi ster/ da lan song la dris la shog zer bas/ yang mgar gyis shog dril tha ma de rgyal po'i phyag tu phul nas/ 'phrin re la rgya bod bar la 'gro mi 'ong / rgyal po khyed kyi gsung de'i lan 'di lags pas gzigs par zhu zhes zhus pas/ der rgyal pos kha phyes nas gzigs pas 'di ltar ro/ khyed rgya nag gi rgyal po nor longs spyod yod/ nga bod kyi rgyal po la longs spyod de bzhin med de/ rgyal po khyed nor longs spyod yod pa la dgyes nas bu mo ster na/ ngas sku lus kyi bkod pa lnga stong du sprul nas/ gser dngul gyi longs spyod/ 'bru dang / dar zab dang / gos dang / rgyan dang / zas kyi longs spyod rnams lha'i longs spyod la 'gran nus pa tsam byed la/ gzhan yang phyogs bzhi nas las sgo re phyes nas/ khyed mtha'i nor rdzas thams cad kyang dbang med du nga'i sgo drung du 'du zhing / longs spyod dang ldan par byed do| |de ngo mtshar mi che'am/ de ltar byas kyang lha gcig mi ster na/ ngas sprul pa'i dmag khri phrag lnga btang nas/ khyod gsod/ lha gcig phrogs/ yul khams thams cad bcom la bzhag gi bya ba 'dug pas/ rgyal po de sngar bas kyang skrag par gyur te/ rgyal po de'i thugs la nga'i bu mo 'di 'dod mkhan mang yang / phugs su bod kyi rgyal po 'di la ster dgos pa 'dra bsam zhing / thugs ma bde bar pho brang du byon no/ /de nas yab rgyal po dang / yum btsun mo dang / sras rgyal bu dang / lha gcig rnams gros byas pas/ yab na re/ chos rgya gar nas byung ba yin/ khong drin che bas rgya gar chos kyi rgyal po la ster gsungs so/ /yum ser sna che bas stag gzig nor gyi rgyal po la ster zer ro/ /rgyal bu lus rtsal