[A:72]'dogs nus par 'gyur/ /de bas bdag rang 'tshe med 'tsho sla ba'i/ /gnas der sgrub pa'i rgyal mtshan rtser btags nas/ /rtse gcig mi rtog sems kyis gsol btab nas/ /rang gzhan dgos 'dod 'byung bar the tshom med/ /de phyir kho bo dben par sdod la dga'/ /'chi med bdud rtsi rnyed nas zas ngan spong / /nor bu rin chen rnyed nas gser yang 'dor/ / mchog thob dman pa 'dor ba ji ltar 'khrul/ /sngon chad gdams ngag brgya phrag du ma bslabs/ /'on kyang da dung gzhan dag tshol bar 'dod/ /da ni sangs rgyas thams cad byon lags kyang / /myur du 'tshang rgya'i lam gzhan zhu bsam med/ /zhes sogs gsungs shing / nyams dang rtogs pa'i bdag nyid du gyur to/ / /de'i slob ma kun mkhyen chos sku 'od zer ni/ yul nyang stod kyi gnas utpa la kha phye ba lta bu'i gser sdings su/ gdung sum pa/ yab grub thob kyi rgyal po gser sdings pa gzhon nu 'od dang / yum mgar btsun ma shes rab rgyan gyi sras su sku'i skye ba bzung / g.ya' ma ra'i gtsug lag khang gi 'dab du yum gyi ming po mgar grags pa dbang phyug la/ sbrum ma skyong du bcug nas/ shing pho khyi lo'i ston 'bring nyi ma sgra gcan gyis bzung pa dang dus mtshungs par sku bltams/ yum gyis mtshan bdag med rdo rje btags/ yum gyi lad mo byas pas yi ge 'bri klog dang / chos spyod kyi kha 'don rnams tshegs med par mkhyen/ de nas gser sdings su bla ma dge 'dun la bsnyen bkur te/ bzod pa gsol nas gser sdings chen po'i drung du zhang po dang lhan cig chos nyan pa na/ shin tu gzhon pas rtse thabs 'ba' zhig gis dus 'da' ba gzigs te/ bdag med rdo rje khyod kyi rtsed mgo dang / nga'i chos mgo 'dzugs pa dus mnyam du byed pas nga dang chos la ma gus pa zhig gam/ zhes bka' bkyon pas chos rna bas nyan cing rtse thabs rkang lag gis byed pa la 'gal ba ci mchi/ chos