[A:73]gsungs pa rnams 'di dang 'di'o zhes skyar bas/ kun gyis 'di ni sprul pa zhig go zhes ya mtshan du sgrog cing sngon gyi gnas rjes su dran pa'i tshul brjod pas paN chen shAkya shrI'i sprul par kun gyis shes so/ /bla ma yang dgyes te yab tu zhal gyis bzhes nas/ de phyin gyi bstan bcos rnams kyi sbyar byang du rnal 'byor dbang phyug chen po zhes mdzad do/ /bcu gsum pa la gnas rnying pa chos kyi rin chen gyis mkhan po/ glang pa phang thang pa shAkya dar gyis slob dpon mdzad nas rab tu byung / mtshan yang chos kyi 'od zer du btags/ yab gser sdings pa chen po'i drung du smon 'jug gi sdom pa dang / thog mar dpal 'khor lo sdom pa'i dkyil 'khor du dbang bskur ba thob/ gdams pa mang po zhig gsan pa'i skabs su/ rdo rje 'chang chen byin rlabs kyis/ /byang chub sems la brtan pa thob/ /snang sems srid pa hrul por song / /'gyu ba sems kyi de nyid mthong / /thams cad rtsol med lhun grub rdzogs// zhes zhus pas/ 'o de tsug 'ong ba yin/ ngas ji ltar ngo sprad pa bzhin du khyod la spar btab pa bzhin rtsol med du 'byung ba 'di rang brod gsungs nas/ 'dus pa dang / dgyes rdor gyi dbang / rim lnga/ chos drug /lam 'bras sogs gnang ba na/ gnas pa rtsa yi de nyid shes/ g.yo ba rlung la rang dbang thob/ /bkod pa byang chub sems kyis brgyan/ /lus ngag sems ni bde gsal stong / /rgyu lam 'bras bu'i bzhugs tshul shes/ /zhes zhus pas/ 'o cag pha bu la de tsam re te re sar/ ngas snying po'i lde mig gtad zin gyis gzhon dus bshes gnyen phyogs med grangs med bsten la/ theg pa mtha' dag gi lung nod cig /sde snod rgyud sde thams cad kyi sgo phye la/ 'dod dgu 'byung ba'i nor bu rnams gdul bya'i sems can ris med pa la rang rang gi skal ba dang 'tshams par brims shig /snying po bsdus pa'i lde mig gis/ /sgo lcags btsan yang phyed de mchi/ /thog mar nges shes skyes na yang / /da dung rgyu