[A:82]lar yang phyin/ bde ba can/ rin po che'i padmo kha bye ba sogs skye sgo mang po gda' yang / mtshan nyid kyi dus nas byams pa'i drung du sgro 'dogs bcad snyam nas mdun pa drag pos rten 'brel sgrigs shing / khro phu ba dang dpon slob thams cad rten 'brel 'grig pa zhig byung pas/ nga 'di nas bar do'i rigs mthun du byas nas sems can dpag tu med pa bsgral/ de nas dga' ldan du 'gro gsungs nas byang sems pa gdan sar bskor/ byang sems sku khams 'khrugs pa na/ nga 'gro ba'i rtsis yin te/ nga song na khyed kyang grongs par 'dug pas/ khams sos kyi bar du ngas bsdad do/ /gsungs nas zhag nyi shu lhag tu nyin re bzhin chos zab mo'i 'brel gtam mdzad/ don gcig pa chu glang dpyid 'bring nyi shu lnga'i tho rangs byang sems pa la rdo rje slob dpon du dbang bskur ba'i cho gas rdo rje dril bu gnang nas/ khyed kyi khams ni sor chud 'dug /da nga 'gro ba yin/ ro 'di shi ma thag bsregs kyang chog /nga ro'i nang du 'od gsal bsgom zhing sdod bya ba'i lugs min/ kun spangs kyi bya ba mthar phyin/ dga' spro dang bcas pas gsol ba thob gsungs te mya ngan las 'das so/ /de nas zhag bdun na sku gdung gzhu bas dus 'khor la sogs pa'i rten mang po dang / ring bsrel yungs 'bru lta bu'i phung por gyur/ dge 'dun khri phrag gcig 'dus te sku 'das mchod byas/ skyid phug ru sku 'bum dang / dga' ldan du sku 'bum che ba dang / sku 'dra rin chen bzhengs/ 'di la slob ma'i tshogs rgya mtsho lta bu las yongs su grags pa ni/ khro phu rin chen bsod nams sengge/ 'jam dbyangs bzhi thog pa/ kun spangs grags rgyal ba/ 'jam dbyangs mkhon ston/ thugs rje rin chen sogs sa skya pa'i chen po rnams dang / byang sems rgyal ba ye shes/ sol stod pa dbang rgyal/ mun me brag kha ba/ sron pa kun rgyal rnams la kun spangs bu bzhir grags pa dang / shes rab 'bum/ kun mkhyen 'phags 'od/ mkhas btsun yon tan rgyal